Pêşmergeyên ku di şerên li dijî DAIŞ’ê de birîndar bûyîn û heya niha jî bi temamî ne hatîn dermankirin, bertek nîşanî rayedarên PDK û hikûmeta Herêma Kurdistan a Federal didin.  Peşmergeyên birîndar ku di rewşekî zahmet de ne, li gel ku dixwazin bi pereyê xwe bên derman kirin jî, lê di nexweşxaneyan de ji wan re hincetan derdixin û dermankirina wan ji bo demek ne diyar tên taloqkirin.  

 

‘AN MIN BAŞ BIKIN AN JÎ BIKUJIN’ 

 

Pêşmergeyê bi navê Dîyar ku di şerê li dijî DAIŞ’ê de çend caran bi giranî birîndar bûye û nehatîye derman kirin, di videoyekê ku dema bi hevalê xwe yê bi navê Serxwebûn ê medya civakî parve dike de, pirsgirêka xwe wiha vedibêje: ‘’Min li dijî DAIŞ’ê heya dawî şer kir û ez ne reviyam. Ez çend carî bi giranî birîndar bûm, min pir xwîn winda kir, lê ji bo min ne xeme ku ez bi mirim, bila ez bibim fedayê xaka Kurdistanê. Lê belê êdî bese, hemû daîreyên sazîyên hikûmetê bila min bibînin, çi dikin bila bikin ez tenê daxwaza mafên xwe dikim. Ez li dijî şerê DAIŞ’ê birindar bûm, min ji xwe re pere deyîn kir, lê çima min derman nakin û min ji vê rewşê dernaxin. An min baş bikin an jî min bikûjin.” 

 

Pêşmerge Diyar, di videoyê de gotinên Serokê giştî yê PDK’ê Mesut Barzanî bi bîr tîne û dibêje: ‘’Ma ew ne Musut Barzanî bû ku di ragihandinan de digot, dilopek xwîna pêşmergeyan jî di herike ligel min bedelî hemû dewlemendî û malê cîhanê ye. Belê Barzanî, li gotinên xwe xwedî derkeve li hewara aleme were ji bo xatirê xwedê. Ez pir êşan dikişinim ez dîn û har bûme.’’ 

 

Di vê girte videoyê de pêşmerge Diyar, demance girtiye destê xwe û van tiştan dibêje: ‘’Min ev demance rakiriye yan ezê dawî li jiyana xwe bînim yan ezê dawî li jiyana kesekê binim, êdî bese gihişte dawîyê, bila xeber bidin min yan min bibin derman bikin yan jî min bikujin.’’ 

 

Pêşmerge Diyar, bang li gelê herêmê jî dike û dibêje: ‘’Li hemberî van bêmafiyan êdî bêdeng nemînin, ne tirsin, daxwaza mafê xwe bikin.’’ 

 

MA /Erdogan Altan