STENBOL – Hiqûqnas Ercan Kanar pergala nû ya li Tirkiyeyê şiband “Pergala monarşiya tîpa rejîma reîsiya Azerbaycanê” û got: “Piştî pêşnûmaya qanûna OHAL’ê birin Meclîsê, dê Tirkiye bikeve rejîmek awarte ya mayînde.”
Hiqûqnasê ceza Ercan Kanar pergala nû ya li Tirkiyeyê nirxand. Kanar di destpêka axaftina xwe de pergala nû ya li Tirkiyeyê şiband pergala li Azerbaycanê û got: “Pergala nû ya Tirkiyeyê tîpek li Rojhilata Navîn navê wê komar e lê naveroka wê dişibe monarşiya tîpa rejîma reîsiya Azerbaycanê.” Kanar anî ziman ku pergala demokrasiyê ya parlamenteriyê ya li Tirkiyeyê kêm tê şixulandin qediyaye û got: “Ev pergala nû ya serokatiyê ne dirûst e. Hemû burokratan di kabîneyê de bicih kirin û divê êdî ew her tiştî erê bikin. Meclîs êdî nikare kesî tayîn bike. Êdî dê kesek biryara her tiştî bide. Li Amerîkayê jî pergalek wiha nîne. Lê welêt Meclîs fesh kirin û rayeyê dan kesekî. Berê kontrola hikumetê ya Meclîsê hebû. Di pergala niha de rayeya Meclîsê nema. Di pergala niha de wezîr tu berpirsyariya wan li dijî Meclîsê nîne.”
‘MECLÎSÊ ANÎN ASTA NIKARE BIŞIXULE’
Kanar diyar kir ku Serokomar Meclîsê diyarî parlamenteran kiriye û wiha dewam kir: “Heke mirov ji bo Meclîsê bêje meclîsa çay û qahwe vexwarinê û cihê sohbetê dê pênaseyek şaş nîn be. Wê serokê dewletê bi şêwirmendê xwe re bi komîsyonan birêve bibe. Wê Meclîs êdî bi hebûna xwe ya nimûne hebe û wisa bimîne. Tu rayeya Meclîsê nema û êdî gotinên Meclîsê dê li hewa bimînin.”
‘DARAZ TÊKÇÛYE’
Kanar destnîşan kir ku di pergala nû de dê serokomar welêt di şûna qanûnan de bi biryarnameyan birêve bibe û wiha axivî: “Serokomar dema bixwaze dê OHAL’ê îlan bike. Ji çarşemê ve diyar e ku wê daraz çawa bê birêvebirin. Niha daraz ji xebatek hiqûqî wêdetir di hundirê yekîneyek îdarî de ye. Desthilatdarî bi darazê dixwaze siyasetê dîzayn bike. Dixwazin muxalîfan ji qada siyasetê baivêje û ji aliyê hiqûqî ve bêpar bihêle. Êdî peywîrê dide dadgehan û dadgeh xebatek mîna yekîneya îdarî birêve dibe. Gotin di cih de be daraz li îktîdarê guhdar dike û siyasetê dîzayn dike. Ji niha şûn ve jî dê wiha dewam bike. Niha jî bêyî delîl hebin girtin didomin.”
‘KHK’YAN 10 SAL JÎ NIKARIN KONTROL BIKIN’
Kanar da zanîn ku guhertinên Dadgeha Destûra Bingehîn li paş Dadgeha Destûra Bingehîn a 12’ê Îlonê dimîne û wiha pêde çû: “Serokomar êdî dikare endamên Desteya Dadger û Dozgeran diyar bike. Jixwe wezîrê dadê û musteşar divê desteyê de endamên xwezayî ne. Me di du salên dawî de dît ku Dadgeha Destûra Bingehîn çawa dixebitî û xwedî rolekê ye. Êdî tu rayeya Dadgeha Destûra Bingehîn nemaye. Bi vî awayî dê KHK di 10 salan de jî nikaribin bên kontrolkirin.”
‘BINÇAVKIRIN Û GIRTIN DÊ DERKEVIN ASTA HERÎ JOR’
Kanar pêşnûmeqanûna ji bo piştî OHAL’ê birin Meclîsê jî nirxand û got: “Bi van guhertinan dê li Tirkiyeyê edeta dê rejîma rewşa rejîma awarte bikeve meriyetê û mayînde bibe. Bi van guhertinan dê li Tirkiyeyê binçavkirin û girtin û pêkanîn kêfî derkevin asta herî jor. Pêkanîna lêpîrsîna girtinê ji 30 rojan a derdixin 90 rojan, pêkanînek xofdar e. Tirkiye dê bikeve serdemek totaliter, despot û sultaniyek nû. Jixwe berê jî li Tirkiyeyê dîktatoriya antî-demorkatîk mijara gotinêbû. Lê wê demê ji bo nimûneyê be jî berê rûyê wan li rojava bû. Lê niha Tirkiyeyê berê rûyê xwe zivirandiye Afrîka û Rojhilata Navîn. Tirkiye wê bi despotiya pêkanînên kesekî bê birêvebirin.”
MA / Bîlal Seçkîn