Karsazê kurd ê endamê HDP’ê Kamîl Acar di 18’ê tîrmehê de dema ji Rihayê ber bi Amedê ve dihat 2 kîlo mîtro nezî Qereqola Leşkerî ya Pîrînçlîkê ji aliyê kesên nasnameya wan ne diyar ve hat rawestandin. Wesayîta Acar bi awayek terkkirî li nêzî qereqolê hat dîtin. Der barê aqûbeta Acar de agahiyên nû derketin holê. Hat zanîn ku Acar bi karê bazirganiyê ve eleqeder dibe û berê jî tu xisûmetek wî bi kesî re nîn bûye. Hat îdiakirin ku Acar li nokteyek nêzî Qereqola Leşkerî ya Pîrînçlîkê ji aliyê 3-4 kesên rûpoş û çekdar ên sivîl ve hat desteserkirin. Hat îdiakirin ku van kesan kontrola nasnameyan nedikirin û tenê li plakaya wesayîtan dinêrîn û berdidan. Parêzerê Acar, Îbrahîm Bîlmez têkildarî aqûbeta Acar de ji Ajansa Mezopotamyayê re axivî. 

 

‘EZ Ê SAET DI 21.00’AN DE LI MALÊ BIM’ 

 

Bîlmez bi bir xist ku Acar di 17’ê tîrmehê de bi wesayîta xwe ya taybet ji bo bazirganiyê diçe Nevşehîrê û piştî şevekê ji wir vegigere û got: “2 roj berê saet di 19.00’an de bi telefonê li hevjîna xwe digire. Ji hevjîna xwe re dibêje ‘Ez ber bi Rihayê ve têm û ez ê saet li derdora 21.00’an bigîhîjim malê.’ Pişt re nayê malê û agahî jê nayê girtin. Li ser agahî negirtinê hevjîna Acar agahiyê dide xizmên xwe. Bi xizmên xwe re ber bi Rihayê ve dikevin rê. Li ser rê hemû nexweşxaneyan kontrol dikin û serî li qereqolan didin. Lê best tu agahiyê bi dest naxin.” 

 

‘WESAYÎT DI QEREQOLA PÎRÎNÇLÎKÊ DE DERBAS NEBÛYE’ 

 

Bîlmez diyar kir ku piştî malbat ji Acar agahî nagire li parêzerên malbatê digerin agahî didin û wiha dewam kir: “Serî li dozgeriya Riha û Amedê didin. Kamerayên mobeseyê yên ser rê tên lêkolînkirin. Di kamerayê de xuya dike saet li derdora 20.00’an dikeve Siwêregê û dîsa ji Siwêregê derdikeve. Ji Siwêregê heta Pîrînçlîkê tu navçe nînin. Li vir Qereqola Pîrînçlîkê heye. Li vir baregeha leşkerî ya NATO’yê heye. Liv ir nokteya leşkerî ya cendermeyan heye. Wesayît di vê nokteyê de derbas nebûye.”  

 

‘NIFTEYA WESAYÎTÊ, RUHSAT Û TELEFONA WÎ NÎNIN’ 

 

Bîlmez da zanîn ku malbata Acar li ser vê yekê ji qereqolê heta Siwêregê lêgerîna xwe dewam dike û wiha axivî: “Li ser lêgerîna malbatê wesayît du kîlo mîtro nêzî Qereqola Pîrînçlîkê bi awayekî terkkirî dibîne. Dema wesayîtê dibînin deriyên wê vekirîne. Ji wesayîtê tu tiştek nehatiye desteserkirin. Çenteyê wî di wesayîtê de ye. Devê çente jî venekirine. Hemû kelûpelên wî di wesayîtê de ne. Tenê nifteya wesayîtê, ruhsat, telefon û ew bixwe nîne. Her tişt li cihê xwe ye û wesayîtê zirarek nedîtiye.” 

 

‘KESÊN RÛPOŞKIRÎ Û ÇEKDARKIRÎ RÊ KONTROL KIRIN E’ 

 

 Bîlmez destnîşan kir ku piştî dîtina wesayîtê agahî didin rayedaran û wiha domand: “Mixabin rayedaran girîngiyek pêwîst nîşan nadin. Tenê du leşker tên girtek digirin. Heta ekîba lêkolînê tê cihê bûyerê çend saet derbas dibe. Ekîba lêkolînê jî ji rêzê lêkolînê dike. Li qereqolê nokteya lêgerînê heye. Tê gotin li pêşiya nokteya qereqolê nokteyek derbas dar a 3-4 kîlo mîtro dûr hatiye avakirin. Şahidên vê dibînin jî hene. Şeva Acar winda dibe, hevalek me parêzer di vir de derbas dibe. Hempîşeyê me got ‘Di vê nokteya hatiye avakirin de, 3-4 kesên sivîl ên bi rûpoş û çekdarkirî wesayîtên derbas dibûn plakayên wan kontrol dikirin. Piştî kontrolê derstûra derbasbûna wesayîtan didan.’ Li wir kontrola nasnameyan nakin. Diyar e ku li benda wesayîtan e. Çimkî tenê plakayan kontrol dikin û dihêlin wesayît derbas bibin. Muhtemel heye ku li benda wesayîta Kamîl Acar in.” 

 

3 ŞAHIDÊN NOKTEYA LÊGERÎNÊ DÎTINE HENE 

 

Bîlmez anî ziman ku ji bilî hempîşeyên hin şahidên jî hene û got: “Piştî mesele di nûçeyan de derket, ajokarê kamyonekê jî geriya û wî jî heman şahidiyê kir. Qeyda telefona wî li gel me heye. Kesek din jî di heman saetê de di wir de derbas dibe û ew jî dibêje ku wê nokteya lêgerînê dîtiye. Têkildarî nokteya lêgerînê 3 şahidên me hene. Me bi fermandarê qereqolê re hevdîtin kir, lê mixabin qereqol û rayedarên fermî rewşa vê meseleyê qebûl nakin. Meseleya bê dahurandin a esil vê nokteya hatiye avakirin e. Dibe ku yên vî karî kiribin jî hêzên tarî yên di nav dewletê de bin. Ev îşaretek zivirandina salên 90’î ye. Dibe ku destpêka konseptek nû be. Ji ber vê yekê pêvajoyek talûke ye û em bi endîşe ne.” 

 

Bîlmez got ew ê bi Baroya Amedê re serlêdanek berifreh li dozgeriya Amedê bidin û xwest hemû hûrguliyên têkildarî mijarê bên lêkolînkirin û lêpirsîn. Bîlmez da zanîn ku heyetek ji saziyên civakî yên sivîl pêk tên bi Walîtiya Amedê re hevdîtin kirine û got: “Walîtiyê gotiye ‘heya me ji meseleyê heye. Wê lêkolînkirna me dewam bike.’ Meqamên fermî heta niha tu binçavkirinê qebûl nekiriye.” 

 

'XISÛMETA WÎ BI KESÎ RE TUNE BÛYE’ 

 

Bîlmez destnîşan kir ku di jiyana asayî û jiyan kar de jî xisûmeta wî bi kesî re nîne û wiha got: “Heta niha ji aliyê tu kesî ve gef lê nehatine xwarin. Di warê qanûnî de jî tu problema wî nîne. Heke ku gef lê bihatana xwarin teqez em ê hîn bibûna û me ji hevjîna wî pirsî. Ew jî dibêje tu tiştek wiha nîne. Acar berê jî ji doza KCK’ê ya Şirnexê hatiye darizandin. Karsazek di halê xwe de bû. Li Amedê dijî. Meseleyek wî ya deyn û dan û sitendinê jî tune bû. 3 zarokên wî hene. Em pir bi endîşe ne. Dişube kiryarên ne diyar ên salên 90’î. Ez hêvîdarim wiha nîne û dê konseptek wiha destpê neke.” 

 

‘HEMÛ CIVAKÊ ELEQEDAR DIKE’

 

Bîlmez banga hestiyariyê li hemû aliyên hestiyar kir û got: “Ev mesele hemû aliyên civakê eleqedar dike.”