COLEMÊRG - Malbata Suleyman Aksû yê ku dema ji bo avakirina Kobanê bi 32 hevalên xwe re çû Pirsûsê û ji aliyê çeteyên DAIŞ ve hat qetilkirin, 3 sal e xemgîn in. Dayika Aksû Kûdret Aksû, diyar kir ku di nava 3 salan de êrîşa goristanê, edaleta ku nehatiye cih, cil û bergên lawê wê ku nedane wan êşa wan zêdetir kiriye.
Di 20'ê Tîrmeha 2015'an de 33 ciwanên ku ji bo Kobanê jinûve ava bikin çûn navçeya Pirsûs a Rihayê, ji aliyê çeteyên DAIŞ'ê ve hatin qetilkirin. Ji ciwanên jiyana xwe ji dest dan yek jê jî Mamoste Suleyman Aksû yê navçeya Gevera Colemêrgê bû. Dayika Suleyman Aksû Kûdret Aksû ji Ajansa Mezopotamya (MA) re axivî.
ÊŞA ME PIR GIRANE
Dayik Aksû anî ziman ku lawê xwe li goristana taxa Ormanê definkirine û wiha got; "Me Suleyman bi tevlibûna deh hezaran definkir. Lê ev 5 car e goristana wî rastî êrişan tê. Herî dawî goristana wî di 7'ê gulanê de rastî êrîşê hat. Ji ber êrişan me gora Suleyman hê jî sereraast nekiriye. Kevirê gorê hêna şikandîne. Bila dest ji gora lawê min berdin." Aksu diyar kir ku 3 sal bi ser qetilkirina lawê wê re derbasbûye lê birîna wan wek duh nû ye û wiha axivî: "Suleyman ji bo zarokên Kobanê û aştiyê çû Pirsûsê. Daxwaza wan ew bû ku zarokên Kobanê yên rastî wahşeta DAIŞ hatine bidin kenandin bû. Lê kenê Suleyman û hevalên wî tefandin. Niha ez li dîwarê malê, baxçe, goristanê li kuderê dinêrim Suleyman dibînim.Êşa ku em dikişînin nayê ser ziman, êşek mezin e."
3 SAL E CIL Û BERGÊ SULEYMAN NEDANE MALBATÊ
Aksû bal kişand ser darazandina ku ev 3 sal e berdewam dike û wiha axivî; "Salek li ser dosyayê biryara veşartî hebû. Ji bo sûçdar bên dîtin tu gav nehatin avêtin. Bi dehan sûçdar hene lê heta niha tenê kesek hatiye girtin.Di 3 salan de tenê derheqê yên ku di qetlîamê de birîndar bûn doz hatin vekirin. Di qetlîmê de sûçê kê hebe bila bê darizandin û ceza bigire. Ne 3 sal deh sal jî derbas bibe em ê dev ji doza xwe bernedin."
LAWEK WÊ DAIŞ KUŞT LAWEK JÎ DEWLET Ê
Aksû got ku di ser bûyerê de 3 sal derbasbûye lê cil û bergên Suleyman nedane wan û wiha pêde çû; "Bila cilê lawê min bidin min, bi bîna wan hinek baş bibim. Ev 3 sal e çima cil û bergê lawê min nadin, cilên bi xûn bin jî bila bidin min. Bina lawê min jê tê ez bina lawê xwe dixwazin." Aksû bi çavên girî girtina lawê xwe yê ku bi îfadeyên şahidên nediyar hatiye girtin bi bîrxist û got ku êşa wan her ku diçe zêde dibe. Aksû herî dawî ev helbesta ku ji bo lawê xwe çêkiriye, xwend;
"Ez berê xwe didim Geveroka Rengîn
Ez dinêrim Geveroka rengîn pir xwemgîne
Tabûta Suleymanê min tê birîndar e nalîne
Bejna lawê min dane ber gula bejn reş û xûne."
MA/ Fethî Balaman