Piştî pêvajoya diyalogê ya bi Rêberê PKK’ê Abdullah Ocalan re di 5’ê Nîsana 2015’an hat bidawî kirin û şûn de, pêkanîna tecrîta girankirî ya li ser Ocalan berdewam dike. Hemû serlêdanên hevdîtinê yên malbat û parêzaran her tim hatin redkirin. Parlamenterê Partiya Domakratîk a Gelan (HDP) a Amedê Musa Farîsogullari, tecrîta li ser Ocalan û polîtîkayên hikûmetê yên piştî hilbijartina 24’ê Hezîranê nirxandin. 

 

‘TECRÎT BI ŞERÊ HERÊMÊ VE GIRÊDAYÎ YE’

 

Farîsogullari, diyar kir ku hikûmetê di civîna Desteya Ewlehiya Mîllî (MGK) ya 30’ê Cotmeha 2014’an de polîtîkayên xwe guhert û wiha axivî: “Hikûmetê dûre dawî li pêvjoya diyalogê ya bi Rêberê PKK’ê Abdullah Ocalan re, di 5’ê Nîsana 2015’an de anî û dest bi tecrîta herî giran kirî kir. Tecrît bi şerê li herêmê tê berdewam kirin ve girêdayî ye. Di civîna MGK’ê de, di şexsê Ocalan de biyara şer hat girtin. Piştî hilbijartina 24’ê Hezîranê, li şûna ku tecrîta li ser Ocalan rakin û dawî li polîtîkayên şer ên herêmê bînin, lê pergala Serokkomariyê dê bi qabîneya xwe ya nû pêvajoya şer kurtir bike.” 

 

‘KESÊN ROLÊN XWE DI KOMKUJIYAN DE LÎSTIN NIHA DI QABÎNÊ DENE’

 

Farîsoglullari, qebîneya pêşîn a pergala serokkomariyê nirxand û wiha got: “Kesên cihên xwe di polîtîkayên şer û komjiyên di 3 salên dawî yên li Kurdistan û Tirkiyeyê hatin jiyîn de girtin, niha di qabîneyê de cih digirin. Hulusî Akar ê kirin Wezareta Parastina Mîllî, Suleyman Soylu yê wê demê jî Wezîrê Karê Hûndir bû û niha di qabînê de cih digere û tayîn kirina kesê Serokê Serfermandariyê ku rola wî di qetilkirina 34 mirovên me yên li Roboskî de hebû, tê wateya dê tecrîtê li ser Birêz Ocalan berdewam bikin. Ev  yek dide nîşandan ku dê bi heman polîtîkayan pêvajoya pêş me derbas bibe.”

 

‘EM CÎDIYETEK MEZIN DIDIN BIRÊZ OCALAN’

 

Farîsogullari, anî ziman ku di  serdema nû de ji bo  pêşketina çareseriyê, divê tecrîta giran kirî ya li ser Ocalan bê bidawî kirin û wiha bilêv kir: “Ji bo Ocalan azad bibe emê têkoşîna xwe berdewam bikin. Em cîdiyetek mezin didin birêz Ocalan. Gelê Kurd birêz Ocalan weke rêber û vîna xwe ya siyasî dibîne û her tim ev yekê daniye holê. Pirsgirêka kurd bi çareseriya  demokratîk pêkane. Ji bo li tevahiya  Tirkiyeyê demokrasî pêş bikeve, em ê têkoşîna xwe berdewam bikin.” 

 

‘DAXWAZÊN GELÊ ME, JI BO ME FERMAN IN’

 

Farîsogullarî, di dawiya axaftina xwe de wiha got: “Di xebatên hilbijartina 24’ê Hezîranê de yek daxwaza gelê me hebû, ew jî bi dawî kirina tecrîta li ser Ocalan û azadiya kirina Ocalan bû. Helwesta gelê Kurd di vî warî de pir zelale. Ev daxwaza gelê me ji bo me fermane û jêvenegere. Ji ber vê yekê, em ê li dijî polîtîkayên êrîş û zilmê li her qadê helwesta xwe di vî warî de nîşan bidin. Tecrîta li ser Ocalan nahêle pirsgirêkên welat çareser bibe û tu encamê bi dest nexwe.”

 

MA / Ozgur Paksoy