Dengdêrên Colemêrgê xwestin parlamentera wan a girtî Hevseroka Kongreya Civaka Demokratîk (KCD) Leyla Guven demildest bê berdan. 

 

Omer Namoglu diyar kir ku Guven îradeya wan e û got: “Bila wê zû berdin. Divê erka xwe ya li Meclîsê bi cih bîne. Ev doz ne hiqûqî ye, dozek siyasî ye. Pêkanînek wiha tenê li Tirkiyeyê heye. Çima hûn vîna me dîl digirin?” 

 

‘TEKANE SÛCÊ WÊ DAXWAZA AŞTIYÊ YE’ 

 

Recep Aktaş jî got: “Parêzvanê heqîqetê her tim girtîne. Sûcê parlamentera me tenê parastina aştiyê û pêşî girtina mirinê ye. Daxuyaniyên wê ji bo zilm li gelan neyê kirin e. Ev daxuyanî wîjdanî, mirovî, hiqûqî ye û tu hêmanek axaftinên wê bike sûc jî nîne. Bi sedan nûnerên îradeya me girtîne. Divê hemû nûnerên me û Leyla Guven demildest bên berdan.” 

 

'EM GUVEN DI NAV XWE DE DIXWAZIN' 

 

Gulçîn Karaburk jî diyar kir ku hinceta girtina Guven dijminatiya vîna jinê ye û wiha pêde çû: "Vê vîna jinê  Selma Irmak şand Meclîsê, lê niha hatiye girtin û parlementeriya wê jî ji destê wê derxistin. Di hilbijartina 24'ê Hezîranê de gel dîsa vîna jinê nîşan da û Guven kire parlamenter. Lê disa dijminatiya vîna jinê xwe nîşan da û Guven ji girtîgehê dernaxin." Karburk anî ziman ku di dema hilbijartinê de Guven ji ber girtiye li girtîgehê xebatê hilbijartinê birêve bir û li Colemêrg û navçeyên wî jî jinan ev xebatberdewam kirine û wiha  got: "Bila Leyla Guven demildest bê berdan were nava gelê ku wê hilbijartine."

 

 

'VÎNA JINAN AZAD BIKIN' 

 

Gulê Polat got vîna gelê Colemêrgê her dem di hedefê de ye û wiha axivî: "Di hilbijartina 24'ê Hezîranê de parlamenterek xesp kirin. Abdulah Zeydan û Selma Irmak ji ber vîna gelê Colemêrgêne niha li girtîgehê ne. Leyla Guven jî bi avayek bê hiqûqî li girtîgehê de didin sekinandin. Ev hemû dide nîşandan ku vîna gelê Colemêrgê tê cezakirin." Polat diyar kir ku Leyla Guven dema ku Gever hat hilweşandin gel tenê nehiştiye û wiha dawî li axaftina xwe anî: "Guven her dem li Geverê ji gel re dibû alîkar. Li Geverê di serî de jin û her kes pir ji Guven hez dike. Ji xwe  Geverê ji sedî 82 dengê xwe dane. Gever 49 hezar deng da HDP'ê û 7 hezar jî da AKP'ê. Dengê polîs û leşkeran derxe dengê HDP'ê dibe ji sedî 95. Gevera ku sedî 95 deng daye Guven û hevalên wê Guven di nav xwe de dixwaze. Vîna jinan û  Colemêrgê azad bikin."

 

 

'DADGEH JI QESRÊ RE BÎAT DIKE’ 

 

Parlamenterê HDP’ê yê Colemêrgê Saît Dede jî destnîşan kir ku Leyla Guven dengê hemû jin û ciwanan e û wiha axivî: “Vî gelî di 24’ê hezîranê de ji bo Leyla Guven bibe dengê wan hilbijart. Ew dadger û dozger jî dizanin rewşek hiqûqî li holê nîne. Lê ew fermanê ji jorê ango ji Qesrê digirin û biryara girtina birêz Guven didin. Divê darizandina Guven jî ji holê rabûye, lê mixabin tiştek wiha li welêt nîne. Bi vê pêkanînê di şexsê Leyla Guven de li hemû gelê Colemêrgê heqaretê dikin. Birêz Guven îradeya gelê Colemêrgê ye. Divê demildest Guven berdin û li ser navê gelê Colemêrgê tev li xebatên li Meclîsê bibe. Dadgeh di vê mijarê de serî li pêkanîn û hiqûqek skandal dide û ji Qesrê re bîat dike.”