ENQERE – Ji bo Komîsyona Mafên Mirovan a Meclisê, di serdema 24’an de heta îro herî kêm 46 hezar û 753 serlêdan hatine kirin. Ji bo 21 hezar û 642 îdiayên binpêkirina mafên girtiyan tenê 153 caran serdana girtîgehan kiriye.

 

Parlamenterê Partiya Wekhevî û Demokrasiyê ya Gelan (DEM Partî) yê Kocaelî Omer Faruk Gergerlîoglu, têkildarî serlêdanên bo Komîsyona Mafê Mirovan a Meclisê (ÎHÎK) û naveroka serlêdanan di 25’ê Gulanê de pêşniyarpirs da Serokatiya Meclisê.

 

Di 17’ê Hezîranê de bersiva serlêdanê hate dayîn. Li gorî bersivê ji destpêka serdema 24’emîn heta îro 46 hezar û 753 serlêdan ji bo ÎHÎK’ê hatine kirin. Ji van serlêdanan jê 40 hezar û 213 heb ji aliyê welatiyan û saziyan, 6 hezar û 540 heb jî ji aliyê parlamenteran ve hatine kirin.

 

GIRTÎGEH DI RÊZA YEKEMÎN DE YE

 

Di bersivê de agahiyên têkildarî naveroka serlêdanan nehate dayîn. Di nava serlêdanan de herî zêde têkildarî binpêkirinên mafên girtî û hikumxwaran hatine kirin. Ji bo binpêkirinên mafên girtiyan 2 hezar û 949 serlêdan hatine kirin.

 

 

MAFÊ DARIZANDINEKE ADIL

 

Di serdema 25’emîn de, 442 serlêdan hatin kirin, ku di encamê de 455 binpêkirin çêbûn. Binpêkirinên girtîgehan di vê serdemê de hejmara herî zêde ya binpêkirinan pêk anîn. Di vê çarçoveyê de di tevahiya serdemê de 260 serlêdan hatin kirin.

 

Di serdema 26’emîn de, 11,213 serlêdan hatin kirin ku di encamê de 16,230 binpêkirin çêbûne. Di nava van de 3,764 binpêkirinên azadiya ciwarbûn û rêwîtiyê ye, 167 binpêkirinên mafê jiyanê, 3,955 binpêkirinên azadiya kar û peymanê, 3,861 binpêkirinên mafên girtî û hikûmxwaran, 2,116 binpêkirinên mafê darizandineke adil û 464 binpêkirinên azadî û ewlehiya kesane hebûn.

 

 

21 HEZAR Û 642 BINPÊKIRIN, 153 SERDAN

 

Di bersivê de daneyên ji serdanên girtîgehan ji aliyê komîsyonên di bin Komîsyona Mafên Mirovan (ÎHÎK) jî hebûn. Di hemû serdeman de, 21 hezar û 642 binpêkirinên têkildarî girtî û hikumxwaran hatine tespît kirin. Tevî vê hejmara binpêkirinan, komîsyon tenê 153 caran serdana girtîgehan kirine.