STENBOL - Di asta kûrewî de dê kampanyaya nameyan a bi navê “Ez dixwazim bi Ocalan re hevdîtinê bikim” bê destpêkirin.
Ji bo azadiya fîzîkî ya Rêberê Gelê Kurd Abdullah Ocalan û pirsgirêka Kurd li ser zemîneke siyasî demokratîk were çareserkirin, di 10’ê Cotmeha 2023’yan de kampanyaya “Ji Abdullah Ocalan re azadî, ji bo pirsgirêka Kurd çareseriya demokratîk” hate destpêkirin. Di çarçoveya kampanyayê de li gelek deverên cîhanê çalakî û xwepêşandan hatin lidarxistin. Di çarçoveya kampanyayê de dê niha jî di asta kûrewî de kampanyaya nameyan a “Ez dixwazim bi Ocalan re hevdîtinê bikim” bê destpêkirin.
Ji berdevkên kampanyaya “Ji bo Abdullah Ocalan re azadî ji bo pirsgirêka Kurd çareseriya demokratîk” Zubeyde Zumrut û diyar kir ku banga “Aştî û Civaka Demokratîk” a Abdullah Ocalan weke qonaxa sêyemîn a pêngava gerdûnî pênase kir û got: “Ev bang bes ne tekstek e, di heman demê de nexşerêya çareseriya demokratîk a pirsgirêka Kurd e û vîzyoneke polîtîk pêşkêş dike.”
‘KAMPANYAYÊN ME DÊ BIDOMIN’
Zubeyde Zumrut, di dewama axaftina xwe de bal kişand ser nîqaşên li ser “mafê hêviyê” û ev tişt anî ziman: “Hiqûqnas di vê çarçoveyê de balê dikşînin ser ‘mafê hêviyê.’ Konseya Ewropayê jî di Cotmeha 2024’an de weke şertê mutleq nîşan dabû ku divê Tirkiye heya Cotmeha 2025’an reforma têkildarî muebeta girankirî pêk bîne. Ji ber wê yekê divê ev pêngav êdî were avêtin. Her wiha kampanyaya me tehliyekirina hemû girtiyên siyasî jî armanc dike. Xebatên bi vî rengî wê bi xurtî berdewam bikin. Ev kampanyaya ku hem li Tirkiyeyê û hem jî li qada navneteweyî bi hev re tê meşandin, bingeha pêvajoyeke nû ya demokratîk av dike.”
‘PE’YÊ GELEK PESNÊ BANGA ABDULLAH OCALAN DA’
Ji rêveberên kampanyayê Hatîp Dîcle jî bi bîr xist ku dê 86’emîn rûniştina Meclisa Parlamenterên Konseya Ewropayê dê di dawiya meha Hezîranê de bê lidarxistin û got ku ji bo di vê rûniştinê de sererastkirina têkildarî “mafê hêviyê” bikeve dewrê bi armanca ku zext li Tirkiyeyê bê kirin ew ê xebatan bi rê ve bibin. Hatîp Dîcle got ku divê êdî saziyên Ewropayê pêngavên hewce biavêjin û Tirkiye jî erk berpirsiyariyên xwe bi cih bîne û da zanîn ku di rapora Tirkiyeyê ya Parlamentoya Ewropayê de ku hefteya borî hate qebûlkirin gelekî pesnê banga Abdullah Ocalan a 27’ê Sibatê hatiye dayîn û got: “Ev yek nîşan dide ku nêzîkatiya têkildarî pirsgirêka Kurd di siyaseta Ewropayê de kûr bûye û bendewariyên têkildarî çareseriyê belavtir bûne.”
Dîcle, diyar kir ku tê payîn bi dirûşma “z dixwazim bi Ocalan re hevdîtinê bikim” kampanyayeke nameyan a nû ya gerdûnî bê destpêkirin.