Girtiyê nexweş Soydan Akay di sala 1993’yan de li Îzmîrê bi îdiaya “xerakirina yekitî û yekparetiya dewletê” hate girtin û cezayê muebbedê lê hate birîn. Akay, li Girtîgeha Hejmar 9 a Sîlîvrî ya Stenbolê tê ragirtin û di meha Adarê de 3 jê bi lezgînî bi giştî 7 caran rakirin nexweşxaneyê. Akay, ji ber gazinên dil, enfeksiyon û tansiyonê rakirin revîra girtîgehê. Akay, her carê bêyî sewqî nexweşxaneyê were kirin dîsa şandin qawîşa wî. Xizmên Akay, tetkîkên wî nîşanî bijîşkan dan û bijîşkan gotin ku krîza dil derbas kiriye. Akay ku tevî nexweşiyên xwe jî nayê berdan, heta niha tehliyeya wî 4 caran ji h3ela Lijneya Îdare û Çavdêriyê ve hatiye taloqkirin. 

 

 

Birayê Akay û parêzerê wî Veysel Akay da zanîn ku dema cezayê kekê wî di Tebaxa 2023’yan de xelas dibû û got: “Gotina ‘Tirkiye dewleta hiqûqê ye’ bi nêzikatiya wê ya li hemberî girtiyên nexweş têk çûye. Nepêkane mirov bibêje Tirkiye dewleta hiqûqê ye. Bi taybet Lijneyên Îdare û Çavdêriyê biryarên keyfî, derhiqûqî û derexlaqî didin. Ev lijne ne tenê ji bo Soydan, ji bo girtiyên din jî mîna mekanîzmaya giyotînê dixebitin.” 

 

'ÎTÎRAZA ME HÊJ NEHATIYE NIRXANDIN’ 

 

Bi domdarî Akay diyar kir ku dema cezayê girtiyan qediya divê bên berdan û ev tişt anî ziman: “Divê kekê min jî were berdan. Ev 8 sal in di hucreya yekkesî de tê ragirtin. Kesekî dilnizm e û nexwest em bikin rojev. Got ku girtiyên di mercên girantir de tên ragirtin hene û ji hêla exlaqî ve qebûl nekir. Lê belê di nava çend mehên dawî de rewşa wî giran bû û krîza dil derbas kir. Ev li wir ferq nekirin. Hevalên me yên bijîşk ên derve ev ferq kirin. Lewma divê tavilê bê berdan. Mercên tedawiyê yên girtîgehê nînin. Dermanên giran tên dayin. Em nikarin jê re dermanan bibin. Ji bo rewşên nebaştir neqewimin me îtîraz kir lê hêj nehatine nirxandin jî. Îtîraza me di 24’ê Adarê de kiriye hêj li dozgeriyê tê sekinandin.” 

 

'XIZMETA TENDURISTIYÊ YA GIRTIGEHÊ BLOKE BÛYE’ 

 

Akay, got ku kekê wî krîza dil derbas kiriye lê jê re gotine “tansiyon e” û dîsa şandine girtîgehê. Akay, wiha domand: “Me bi rêveberiya girtîgehê re hevdîtin kir lê encamek jê derneket. Ji ber ku hejmara nexweşan zêde ye li girtîgehê di demên dawî de nikarin tedawiyê bikin. Weke mînak, kardiyalog diçe wir û 4 saetan tê sekinandin. Derfeta xizmeta tenduristiyê ya Girtîgeha Sîlîvriyê bloke bûye.” 

 

BANGA HESTIYARIYÊ

 

Akay, bi lêv kir ku wan ji bo tehliye û taloqkirina cezayê Soydan Akay serlêdan kirine û wiha pê de çû: “Roja duşemê ez bi xwe dê biçim bi dozger û dadgeha cezayên giran re hevdîtinê bikim. Dermanên niha didin wî û bizava wî niha li ser pêyan digire. Rewşa wî niha di bin kontrolê de ye lê nediyar e dê çi bibe. Ser re jî di hucreya yekkesî de tê ragirtin. Ji ber piştevaniyê, bi taybet ji min xwest ku spasiya raya giştî bikim. Got kesên rewşa wan girantir hene û nexwest bibe rojev. Lê weke malbat û parêzerên wî em naxwazin bi rewşekî cidî re rû bi rû bimînin. Lewma em daxwaza xwe ya tehliyeyê careke din bi wezareta dadê, rayedarên hikûmetê û dadgeran re radigihînin.” 

 

'NABE KU GIRTIYÊN NEXWEŞ BIBIN MIJARA BAZARIYÊ’ 

 

Akya, anî ziman ku di pêvajoya nû de hewceye girtiyên nexweş bên berdan û axaftina xwe wiha qedand: “Di demeke dewlet dixwaze bi Kurdan re aştiyê bike de divê Soydan û yên mîna wî tavilê bên berdan. Li rexekî gotina ‘xwişk-biratiyê’ li rexa din mexdûrkirin nabe. Nabe ku Soydan û girtiyên mîna wî bibin mijara bazariyê. Van kesan pir zû de mafê tehliyeyê girtine. Bi taybet jî sererastkirinên Wezareta Dadê ya di vê mijarê de em weke tawîz qebûl nakin. Girtiyên mîna Soydan bên berdan jî êdî dereng mane. Pirsgirêkên cidî yên tenduristiyê dijîn. Lewma divê tevek bêyî bazariyê bên berdan.” 

 

MA / Omer Îbrahîmoglû