ENQERE - Berdevka DEM Partiyê Ayşegul Dogan bersiv da gotina Berdevkê AKP’ê Omer Çelîk ku digot; “Trafîka Îmraliyê bi dawî bû” û wiha got: “Tiştekî qediyayî tune ye. Em dibêjin bila ev destpêkek be û tecrîd were rakirin.”
Berdevka Partiya Wekhevî û Demokrasiyê ya Gelan (DEM Partî) Ayşegul Dogan têkildarî geşedanên di rojevê de li navenda giştî ya partiyê daxuyanî da. Ayşegul Dogan, ji ewil kesên li Kartalkaya ya Boluyê di şewatê de jiyana xwe ji dest dayin bi bîr xist û got ku ji bo berpirsyar bên darizandin dê pêvajoyê bişopînin.
Bi domdarî Ayşegul Dogan bal kişand ser tayînkirina qeyûm a li Şaredariya Sêrtê û got ku ne ji bo cezayê li hevşaredar hatiye birîn lewma qeyûm tayînkirin lê ji bo qeyûm were tayînkirin ceza hatiye dayin. Ayşegul Dogan, xwest îktîdar dev ji tayînkirina qeyûman berde û got: “Hûn cara sêyemîn tayînkirina qeyûman re nikarin encamekê bi dest bixin.”
‘GELO DEWLET AMADE YE?’
Ayşegul Dogan, bi domdarî anî ziman ku dewleta tirk destkeftiyên gelê Kurd ji bo xwe weke “ewlehiya neteweyî” dibîne û ev tişt anî ziman: “Gelo dewlet ji bo guherîn û veguherîna demokratîk amade ye? Hêj jî her destkeftiyên gelê Kurd ji xwe re weke pirsgirêka ewlehiya neteweyî dibîne. Şandeya Îmraliyê ya DEM Partiyê hem bi birêz Ocalan re hem jî li Meclisê çendek hevdîtin kir. Rewşekî erênî çêbû. Divê ev hewayê erênî bê pêşxistin. Ev rewş, bi tayînkirina qeyûman baştir nabe. Werin em navekî lê bikin. Divê Meclisê înîsiyatîfê li xwe bigire. Pêdiviya Tirkiyeyê bi aştî, azadî û demokrasiyê heye. Bila komîsyoneke bi rayeyên taybet hatiye amadekirin bê avakirin. Û bila ev komîsyon xebatên xwe ji raya giştî re vekirî bike.”
BILA MERCÊN OCALAN BÊN GUHERANDIN
Ayşegul Dogan, got ku divê mercên Abdullah Ocalan bên guherandin û wiha pê de çû: “Bila zemîneke wekhev bê amadekirin. Her kes li benda bangawaziyê ye û her kes dixwaze şer biqede. Em jî dibêjin bila sedemên bûne bikaranîna çekê ji holê bên rakirin. Şandeya DEM Partiyê peyamên birêz Ocalan bi raya giştî re parve kir. Rayedarên dewletê gavan naavêjin, berpirsyartiyê li xwe nagirin û cidî nêz nabin. Divê di ferqê de bin bê ka bi pirsgirêkeke çiqasî girîng re rû bi rû ne. Serokkomar dibêje; ‘Bila çekan binax bikin.’ Dê li ku binax bike? Dê piştre çi bibe? Bersiva van pirsan tune ye. Tecrîd nayê rakirin û nahêlin birêz Ocalan bi derdorên cuda re hevdîtinê bike. Divê bingeha vê bê amadekirin. Dê vê bangê çawa bike, dê ji kê re bike û pêwendiyê çawa bi rêxistinê re deyne?
PÊDIVIYA ME BI GEFAN NÎNE
Pêdivî bi gefan, şer, şantaj, bombe, ÎHA û SÎHA’yan nîne. Meseleya Kurd, meseleyeke demokrasiyê ye. Meseleya maf û azadiyan a gelekî ye. Divê hiqûqa biratiyê bi awayekî wekhev û di bin misogeriya qanûnan de bê cîbicîkirin. Heke hûn wiha nêz nebin, çareser nabe.”
BERSIV DA ÇELÎK
Li ser pirsa rojnamegerekî ya têkildarî daxuyaniya Berdevkê AKP’ê Omer Çelîk ku digot; “Trafîka Îmraliyê bi dawî bû” jî Ayşegul Dogan wiha got: “Agahiyeke wiha bi şandeya me re nehatiye parvekirin. Li gorî me divê hevdîtin bidomin. Ji bo rakirina tecrîdê me gelek caran bang kir. Divê tecrîd rabe û birêz Ocalan bikare bi şandeya DEM Partiyê, malbat û parêzerên xwe û derdorên cuda yên civakê re hevdîtinan bike. Birêz Ocalan muxatabê esasî yê aştiyê ye û şertên giran ên tecrîdê yên tê de tê ragirtin nabin. Li şûna Çelîk bûma dê min zimanekî wiha bikar neanîbûya. Di halê hazir de tiştekî qediyayî tune ye. Em dibêjin bila bibe destpêkek. Bila xelas nebe, bila tecrîd bê rakirin. Xwezî Çelîk zimanekî bêhtir çêker, bi berpirsyar û cidî bikaraniya.”