AMED – Tirkiye bi îdiya “Dê aramiyê bibe Efrînê” 52 roj in êrîşî Efrînê dike. Welatiyên Amedê li dijî êrîşan bertek nîşan dan û diyar kirin ku desthilatdariya li Tirkiyeyê bêaramiya xwe vediguhezîne Efrînê û li dijî destkeftiyên kurdan dijminahiyê dike.
Li gel biryara agirbestê ya Konseya Ewlekariya Neteweyên Yekbûyî (KENY), şerê Tirkiyeyê û komên girêdayî wê OSO yên li dijî Efrînê di roja 52’yemîn de dewam dikin. Heta niha gelek zarok jî di nav de bi sedan sivîl jiyana xwe ji dest dan. Lê li gel hemû êrîş û kuştina sivîlan jî desthilatdariya Tirkiyeyê îdia dike ku û dibêje “Em ê aramiyê bibin Efrînê û bajar radestî efrîniyan bikin.” Desthilatdarî vegotina van îdiayan xwe dewam dike.
Me wek Ajansa Mezopotamya li kolanên Amedê vê angaşta desthilatê ji welatiyan pirsî û wan jî bersiv da.
‘ARMANC DESTKEFTIYÊN KURDAN E’
Şêniyên Amedê yên ji mîkrofonên me re axivîn diyar kirin ku angaşta dê Tirkiye aramiyê bibe Efrînê li dijî rastiyêye û wiha gotin: “Bi van êrîşan aramiya li wir hebû jî ji holê rakirin. Efrîn bûka Kurdistanê ye. Bajarê Kurdistanê ye. Armanca Tirkiyeyê ya herî mezin ew e ku, destkeftiyên kurdan têk bibe û ji dest wan derbixe. Bi êrîş û şer aramî nayê tu deverê. Gelê kurd wek dijmin dibîne.”
‘BI BOMBEBARANKIRINÊ ARAMÎ ÇÛYE KU DERÊ’
Welatiyan da zanîn ku her roj zarok jî di nav de sivîl tên kuştin û ev tişt gotin: “Bi tang, bombe, top û balafiran tu kes nikare aramiyê bibe tu deverê. Jixwe li Tirkiyeyê gelek pirsgirêkên heyî hene, lê gelo wê niha jî aramiyê bibe Efrînê? Desthilatdarî bêaramiya tirsa ketina xwe dibe Efrînê. Destkeftiyek kurdan li Çînê jî çêbibe dê Tirkiye êrîşî wir jî bike. Divê demil dest operasyon bê rawestandin û leşkerên xwe vekişîne.”