AMED – Wezareta Karê Hundir ji bo lêpirsîna Amedsporê mufetîşan şand. Serokê Kulubê Nurullah Edemen îdiayên piştî lêpirsînê dê qeyûm tayînî kulubê bê kirin piştrast kir û got: “Lêpirsîna kulubek futbolê ya ji aliyê Wezareta Karê Hundir vê pêk tê, rewşek tu demê nehatiye dîtin.”
Amedspor dike û nake nikare ji mueyîdeyên Federasyona Futbolê ya Tirkiyeyê (TFF) rizgar bibe. Vê carê jî Wezareta Karê Hundir, Amedsporê kir hedef û xist bin şopandinê. Wezaretê 3 mufetîşan şand û li kuluba Amedsporê dest bi lêpirsînê kir. Hat zanîn ku hefteyek zêdetir e mufetîş li Maseya Komeleyan a Walîtiya Amedê lêpirsînê didomînin. Hat hînbûn ku heta niha tu agahî nedane rêveberên kulubê.
Îdiaya dê piştî lêpirsîn temam bibe, qeyûm tayînî kulubê bê kirin jî di rojevê de ye.
Serokê Kuluba Amedsporê Nurullah Edemen têkildarî mijarê agahî da Ajansa Mezopotamya (MA) û îdiayên lêpirsîn û tayînkirina qeyûm piştrast kir. Edemen destnîşan kir ku bêyî hincet nîşan bidin ji nişka ve destpêkirina lêpirsînê rê li ber pirsnîşanan vekiriye.
‘TENÊ NE KONTROLEK E’
Edemen da zanîn ku mufetîşan lênûska lîjneya rêveberiyê, tabloyên fînansmanê, têketin û derketina hatin û lêçuyînê ji wan xwestine û van hemû belgeyan demil dest radest kirine. Edemen anî ziman ku hemû kar û barên dikin fermî û qeydkirîne û got: ““Lêpirsîna kulubek futbolê ya ji aliyê Wezareta Karê Hundir vê pêk tê, rewşek tu demê nehatiye dîtin. Ev tenê ne kontrol e. Em nizanin dê pêvajo çi bîne pêşiya me. Lê dibe ku her tişt pêk bê.”
‘DIVÊ KULUB LI SER PIYA BIMÎNE’
Edemen diyar kir ku piştî qeyûm tayînî Şaredariya Bajarê Mezin a Amedê hat kirin hemû desteka aborî paş de hat vekişandin û got: “Rewşa aborî ya kulubê ne baş e. Ji ber vê yekê divê gelê bajêr xwedî li tîma xwe derkeve. Bi boneya navê me Amedspor e tiştek nema ku neanîn serê me. Em bi her tiştî re hevrû dimînin. Ji ber rewşa aborî em di pêvajoyek zehmet de derbas dibin. Divê ev kulub li ser piya bimîne. Heke ku tu ji trîbûnan kêm bimînî dê tîma te qels bimîne. Divê alîgir trîbûnan tije bikin û alakariyê bidin tîma xwe.”
‘LI GEL ZEXTAN JÎ SERKEFTÎ YE’
Edemen destnîşan kir ku zext tu demê ji ser wan kêm nebûne û tîma wan li gelek deveran rastî êrîş û zextên tund hat. Edemen got ku li gel hemû zext û tiştên li dijî Amedsporê pêk tên jî dîsa tîmek serkftî ye.
MA / Lezgîn Akdenîz