Ahmet Alcan ê ji Semsûrê, li Qereqola Dolan a gundê Ovakoy ya bi ser navçeya Silopiya ya Şirnexê ve leşkeriya mecbûrî dikir. Alcan ji bo beşdarî operasyona Efrînê nebe, ji yekîneya xwe firar kir. Alcan destnîşan kir ku di 18’ê Sibatê de ji bo tev li operasyona li Efrînê bibin, fermandarê wan ferman daye hin leşkerên li qereqolê û piştî fermanê beriya 3 rojan, roja ku wê sewqiyat bi rê ve bikeve ji yekîneya xwe firar kir. Alcan got ku ew operasyona li Efrînê rast nabîne û ji bo ew li dijî kuştina mirovan e nexwestiye beşdarî operasyonê bibe. 

 

‘HEVALÊN MIN ÊN LEŞKER NIHA LI EFRÎNÊ NE’ 

 

Alcan anî ziman ku di rojên destpêkê yên operasyona Efrînê de gelek leşkerên li gundê Ilicalar û Siyahkaya yên di bin banê Qereqola Dolanê de şandine Efrînê û got: “Du hevalên bi min re leşkeriyê dikirin, ji Colemêrg û Hatayê niha birine Efrînê. Dê ji tabûra ez lê bûm jî leşkerên asayî jî bişandanan Efrînê. Ez jî ji vê yekê reviyam. Leşkerên wir naxwazin biçin Efrînê. Lê dê bi zorê wan bibin.”

 

‘GELEK KESÊN DIXWAZIN FIRAR BIKIN HENE’ 

 

Alcan diyar kir ku di 15’ê Mijdara 2017’an de bi zorê wî birine leşkeriyê û wiha got: “Ez 3 mehan li Qereqola Dolanê mam, her tim heqaret li min dikirin û di bin zextan de bûm. Ji ber em bi kurdî axivîn fermandaran em derb kirin. Gelek leşker ji ber tirsê nikarin fîrar bikin. Hevalek min xwest firar bike, çawişê pispor Ramazan gule berdayê. Gule li hevalê min neketin. Ew hevalê min ku bi erzanî ji guleyan rizgar bû, fermendaran ew derb kirin.” 

 

‘HEKE EM ÇEKÊ RED BIKIN DÊ ŞER JÎ BI DAWÎ BIBE’ 

 

Alcan da zanîn ku bi operasyona Efrînê re gelek tişt hatine guhertin û ev tişt got: “Leşker bi tu awayî ji tu tiştekî re nikare destûrê bixwaze. Destûra çûyîna nexweşxaneyê jî nadin. Ez li dijî şer im. Min guh da dengê wîjdanê xwe. Ez bang li hemû ciwanan dikim ku reda xwe ya wîjdanî bi kar bînin. Ji bo pêkhatina aştiyê divê her kes çekên di destê xwe de berde. Heke ku em neçin leşkeriyê û red bikin dê aştî bê Rojhilata Navîn.” 

 

MA / Cîhan Olmez