Ji damezrînerê Kongreya Neteweyî ya Kurdistanê (KNK) Hevserokê Rêxistina HDP’ê ya Êlihê Nîzamettîn Toguç ê ku bi salane ji bo yekîtiya neteweyî ya kurd xebatê dide meşandin, xebatên yekîtiya neteweyî nirxand. Toguç anî ziman ku kar û erka herî lezgîn a gelê kurd ew e ku yekîtiya neteweyî pêk bînin û bi avakirina yekîtiyê re dê êrîşên ser Efrînê paş de bên qewirandin. 

 

Toguç bibîr xist ku xebatên KNK’ê yên ji bo yekîtiya neteweyî ji sala 1994’an vir ve didome û ji bo avakirina yekîtiya neteweyî ji partiyên siyasî bigire heta saziyên sivîl li hemû saziyên kurdan geriyane. Toguç got ku li gel xebatan jî kongreya ji bo yekîtiyê kom nekirin û ji bo xebatên yekîtiyê jî di sala 1999’an de Kongreya Neteweyî ya Kurdistanê li bajarê Lehey ê Holandayê ava kirin.

 

‘EM NEBIN YEK, EM HERIN YEK BI YEK’  

 

Toguç behsa xebatên destpêkê yên KNK’ê kir û got: “Me KNK’ê ava kir lê mixabin hêj hemû sazî û dezgehên kurd di bin sîwana wê de cih nagirin. Li gel astengiyan jî xebatên me dewam kirin. Hêj KNK ji bo yekîtiyê bênavber xebatan dide meşandin lê mixabin hêj hemû Kurdistanê temsîl nake. Sedemê vê yekê jî ew e ku hêj gelek partî û saziyên kurd têde cih nagirin. Ji bo kombûna kongreya neteweyî her tim xebatên KNK’ê hene lê hêj hene lê dîsa em kom nabin. Lê ev wisa nameşe. Çawa ku Cegerxwîn gotiye ‘Hûn nebin yek hûnê herin yek bi yek.’ Li ser vê esasê em jî dibêjin, heke kurd nebin dê yek bi yek biçin. Îro jî em div ê baweriyê de ne.”

 

'DIVÊ KOGNRE BÊ ÎNŞAKIRIN’ 

 

Toguç diyar kir ku heke Kongreya Neteweyî ya Kurdîstanê bihata avakirin dê kurdan li Kerkûkê winda nekira û got: “Yekîtiya gelê kurd hebûya êrîşên li ser Efrînê dê pêk nehatina.Yekîya her kesî heye, çima bila yekîtiya kurdan tune be. Heta yekîtiya me ya neteweyî ava nebe, dê halê me jî wiha be. Dewletên dagirker her roj êrîşî ser axa parçeyên Kurdistanê dikin. Li dijî van êrîşan kombûna kongreya neteweyî j inan û avê ferztir e. Divê Kongreya Neteweyî ya Kurdîstanê demil dest kom bibe. Pêwîste em kom bibin û gelê kurd jî êdî xwe li cîhanê bide nasin. Yekîtiya gelê kurd dê siyaseta kurdan jî xûrt bike.”

 

'PEYWÎRA LEZGÎN AVAKIRINA YEKÎTIYÊ YE’ 

 

Toguç ji bo yekîtiya neteweyî ya kurd bang li hemû sazî û dezgehên kurdan kir û ev tişt got: “Divê hemû sazî û partiyên kurd baş dizanibin, peywîra me ya lezgîn pêkanîna yekîtiya kurd e. Bêyî ku em berjewendiyên xwe kesane bifikirin, divê em wek netewî bifikirin. Em hêza xwe bikin yek ku ji van komkujiyan re dikaribin bêjin bes e û rawest e. Heke yekîtiya me hebe, kes wêrekiyê nake ku êrîşan bibe ser xaka Kurdistanê. Êrîşên li ser Efrînê dide nîşandan ku êdî pêdivî bi yekîtiya neteweyî ya kurd heye. Duh êrîş li Kerkûkê bûn, îro li ser Efrînê ne û dê sibê û du sibê jî li ser Mahabad û Hewlêrê bin. Dermanê vê pirsgirêkê li gel me ye. Heke em bibin yek êm ê hemû êşên xwe derman bikin.” 

 

MA / Metîn Yoksu