AMED- Gardiyanên Girtîgeha Jimare 2 a Xarpêtê, girtiyên ku jimariya li ser piyan û di nîzama leşkerî de qebûl nekirin, derb kirin.
Li Girtîheha Jimare 2 a Xarpêtê û Girtîgeha Tîpa L a Kalkandere ya Rîzeyê, di demên dawî de binpêkirinên mafan zêde dibin. Ji ber vê malbatan serî li Şaxa Komeleya Mafên Mirovan (ÎHD) a Amedê da. Malbatan diyar kir ku jimariya li ser piyan û di nîzama leşkerî de li girtiyan tê ferzkirin û girtiyên ev yek qebûl nekirine gardiyanan ew derb kirine.
Sarya Yîgît, bi lêv kir ku danê sibehê birayê wê Mûstafa Yîgît ê di Girtîgeha Jimare 2 a Xarpêtê de ye bi riya telefonê li wan geriyaye û binpêkirinên mafan ên li girtîgehê ragihandine. Sarya got: "Me dizanibû demeke dirêj e bi muameleyên nebaş re rû bi rû dimînin. Cezayê hucreyê, cezayê telefonê, qedexekirina hevdîtinan û desteserkirina amûrên girtiyan hebûn. Lê îro bi telefonê geriya. Got, 'Li vir nîzama leşkerî tê ferzkirin. Jimariya li ser piyan tê ferzkirin. Ji ber em vê yekê qebûl nakin tên derbkirin. Di nav me de hevalên 60-80 salî hene û ew jî hatin derbkirin. Der barê jiyana wan de fikarên me hene. Em dixwazin raya giştî di vî warî de hesas be. Rewşa vir rewşa şer e."
Yîgît, anî ziman ku der barê ewlehiya girtiyan de gumanên hene û bang li raya giştî kit: "Em bang li saziyên mafên mirovan dikin, malbatan dikin ku di vî warî de bi hesasiyet tev bigerin. Em dixwazin demildest pirsgirêk bên çareserkirin. Bi hezaran girtî hene û her roj bi ferzkirinên cuda re rû bi rû dimînin. Der barê jiyana wan de gumanên me hene."
LI RÎZEYÊ FERZKIRINA JIMARIYA LI SER PIYAN
Fûat Demîrtaş, binpêkirinên ku birayê wî Nîhat Demîrtaşê li Girtîgeha Tîpa L a Kalkandere ya Rîzeyê bi wan re rû bi rû dimîne parve kir û got li girtîgehê bi awaykî kêfî mafên girtiyan tên binpêkirin. Demîrtaş, destnîşan kir ku jimariya li ser piyan li girtiyan tê ferzkirin û got: "Birayê min got nîzama leşkerî û jimariya li ser piyan li wan tê ferzkirin. Dema qebûl nekirine heqaretên giran li wan hatine kirin. Ev nayê qebûlkirin. Ji ber vê me serî li ÎHD'ê da. Kuderê hewce be em ê serî li wir bidin. Girtî rûmeta me ne, em ji wan hez dikin û em ê heta dawiyê piştevanê wan bin. Ger wisa biçe wê di rojên pêş de em ê bi binpêkirinên hîn girantir re rû bi rû bimînin. Berî ku pirsgirêkên girantir derkevin, em dixwazin demildest dawî li van pêkanînên kêfî bê."