ENQERE – Parastina Parlamenter Selahattîn Demîrtaş di roja sêyemîn de dewam dike. Demîrtaş li dijî sûcdarkirina KCD’ê got: “KCD ne alîgirê tundiyê ye, alternatîfa tundiyê ye. Wisa xwe birêxistin kiriye. Tenê ne ji aliyê me ve, ji aliyê gelek partî û ji aliyê dewletê ve hêja hat dîtin.”
Danişîna duyemîn a doza Hevserokê Giştî yê Partiya Demokratîk a Gelan (HDP) ê berê Parlamenterê HDP’ê yê Stenbolê Selahattîn Demîrtaş di roja sêyemîn de didome. Danişîn li Kampûsa Girtîgeha Sîncana Enqereyê pêk tê. Di danişîna îro de li bendêye ku parastina Demîrtaş bi dawî bibe û dê dadgeh têkildarî daxwazan biryarê bide.
Parlamenterên HDP’ê û nêzî 50 parêzeran danişînê dişopînin. Beriya danişîn dest pê bike serokê dadgehê li dijî parêzeran gazinca kişandina wêneyên Demîrtaş ên duh li salona dadgehê hatin kişandin anî ziman. Serokê Dadgehê got: “Ez vê yekê layiqî hevalek parêzer nabînim” û xwest telefonên berîkan ên parêzeran derbixin derveyî salona danişînê.
Pişt re serokê dadgehê tevahiya dosyeyê 3 DVD jî di nav de radestî Demîrtaş kir. Demîrtaş dosyeyan daxwaz kiribû. Demîrtaş ji bo dosyeyan lêkolîn bike dem xwest.
Demîrtaş dest bi parastina xwe kir.
DEMÎRTAŞ PARASTINA KCD’Ê DIKE
Demîrtaş li dijî sûcdarkirin û krîmînalîzekirina Kongreya Civaka Demokratîk (KCD) parastin kir û ev tişt got: “Rêxistinek pir rewa ye. Rêxistinek ji saziyên civaka sivîl, akademîsyen û partiyên siyasî pêk tê. Hûn nikarin heta îro çalakiyek tundî ya KCD’ê mînak nîşan bidin. Tenê tişa ku kiriye, komxebat e. Digotin partiyên nayên cem hev, di bin banê KCD’ê de partî hatin cem hev. Me li derdora maseyekê fikrên xwe nîqaş kir. Hêj xebatên xwe didomîne. Çunkî li dijî qanûnan nîne. KCD ne alîgirê tundiyê ye, alternatîfa tundiyê ye. Wisa xwe birêxistin kiriye. Tenê ne ji aliyê me ve, ji aliyê gelek partî û ji aliyê dewletê ve hêja hat dîtin.”
Parastina Demîrtaş didome…