ENEQERE - Hevserokê Giştî yê HDP'ê Selehattîn Demîrtaş, peyam ji kongreyê re şand û got: “Dilê min bi germahiya mezin li salonê davêje. Ger bersîva faşîzmê girtin be hezar girtîgehan çêkin û cihê me li girtîgehan nemîne jî dîsa têkoşîn dê bidome. Em dê tekoşînek mezin bidin serkeftinek bêhempa bi dest bixin."
Hevserokê Giştî yê HDP'ê Selahattin Demirtaş, ku di 4'ê mijdara 2016'an de hat girtin, ji Girtîgeha tipa F a Edirneyê ji kongreya HDP'ê re peyam şand û hemû beşdarên kongreyê silav kir. Parlamenterê HDP'ê Sirri Sureya Onder peyama Demîrtaş xwend. Demîrtaş hemû beşdardên kongreyê yek bi yek silav kir û hezkirin û rêzkirinê xwe ji kongreyê reşand. Demîrtaş, di peyama xwe de wiha got:
Di vê pêvajoya ku welatê me di qeyranek kûr a aborî re derbas dibe, pirsgirêkên mezin li ser hev pêş dikevin de kongreya me pêk tê. Di pêvajoyek wisa de kongre dibe hêvî, kelecan û baweriyek nû. Ji niha de piroz be. 15 mehin bi hezaran rehevalên me dîl hatin girtin û avêtin zindanê. Her çend bi fizikî em dûr xistibin jî fikra me ji berê bi hêztir û xurttir e. Bila her kes baş zanibe dilê min bi germahiya kongreyê li salona kongreyê hildibe.
Berî her tiştî di 8 salên hevserokatiya min de hemû endam, rêveber, delege û malbatên me yên nirxan ku her dem piştgirî dan min bi hezaran caran spas dikim. Her dem fikara min ew bû ku bibim laîk û we mahçûp nekim. Ez hêj xwe deyndar dibînim. Ji ber ku em ji kevneşopiya kesên ji mere gotin “li ser kêliyê gora min deyndarê gelê xwe çû" binivisin hatine. Deynê me yê li hemberî gel heta ku em sax bin naqede.
Bi vê kongreyê em peywira Hevserokatiyê dewrî hevalên xwe yê nû dikin. Ji niha û şûnde jî tevî kêmasî û nebesiyên xwe ez dê hewl bidim ku bi tecrûbe û hêza xwe bibim piştgirî û di nava hewldanê de bim. Dîsa hevseroka me ya ku me bi hevre bi kêfxweşî hevserokatî kir Hevseroka me Figen û bi hezaran girtiyên din silav dikim.
Bê guman Partiya me HDP dê li dijî polîtîkayên bloka faşîzt a AKP-MHP'ê ku Tirkiye xistiye nava heriya olperestî, nijadperestî, mezhepperestî û zayedîperestiyê, ji bo Tirkiye û Rojhilata Navîn bibe hevî. Gotin em dê HDP’iyan bi binçavkirin, girtin, gef û kuştinan wan ji têkoşînê dûr bixin û belav bikin. Teslîm bigirin. Lê xwe xapandin. Bi qasî ku fêm nekin HDP ji kevneşopî û têkoşînek çawa hatiye, ker, kor û cahil in.
Em wekî dara çinarê ya bi sed salan li dijî hemû zextên faşism, koletî, zext û zordariyê di ber xwe daye hatine. Êdî HDP bûye partiya gelên kurd, tirk, ermenî, ereb, çerkez, elevî, suryanî, êzîdî, xiristiyan, misliman, hemû nasname, baweriyên cuda. HDP, bûye partiya jinê. Bûye partiya karker û kedkaran. Bûye partiya ekolojî û xwezayê. HDP bûye saziya siyaseta.
Beyî ku partiya me xwe di parlamentarizmê de nefetisîne, ji xeta xwe ya tekoşîna rewa dûr bikeve, li dijî tundiyê, bi rê û rêbazên demokratîk li qadan, kolanan têkoşîna xwe mezin bike. Ez bawer dikim ku rêveberiya me ya nû dê bi wêrekî, hevî û biryar xwe bi rêxistin bike û têkoşînê mezintir bike. Serkeftinên mezin bi dest bixe. Ger ku bersîva faşizmê ya li dijî têkoşînê girtin be, hezar girtîgehên nû çêkin jî û cih li girtîgehan nemîne jî têkoşîna me divê berdewam bike. Rêveberên HDP'ê yên nû divê bi hevî, wêrek û biryar e têbikoşin. Em dê li dijî polîtîkayên AKP-MHP'ê heta dawî tekoşîna aştiyê biparêzin. HDP partiya Tirkiye ye. HDP çiqas partiya kurdên bindest be, ew qas partiya tirkên bindest e jî. Bêyî cudahiya nijad, nasname, baweriyan bike em têdikoşin. Divê di pêşerojê de em bi hevre li dijî faşizmê em têkşîna xwe mezin bikin.
Ez bawer dikim ku kongreya me dê bi serkeftinek mezin û coşek mezin bi encam bibe. Bi hevalê xwe yê hucreyê Abdullah Zeydan silav û hezkirinên xwe ji were dişînim. Em dê berxwedanek mezin û xurt bidin. Em dê serkeftinek mezin û bêhempa bi dest bixin. Teqez em dê bi ser bikevin."
BALUKEN: COŞA GELÊ ME BERSÎEVA HERÎ MEZIN E
Parlamenterê HDP'ê yê Amedê Îdrîs Balûken jî ji Girtîgeha Sincanê ya Enqereyê peşam şand. Baluken jî diyar kir ku di vê diroka ku têkoşîna demokrasî aştî û azadiyê tê meşandin de kongre pêk tê û wiha got: "3 salin li dijî partiya me operasyona komkujiya siyasî tê meşandin. Armanca vê yekê ewe ku têkoşîna me ya siyasî asteng bikin. Lê ev tevlêbûn, kelecan û coşa kongreyê bersîvê dide ku ev hewldana wan pûç bûye û encamê bi dest naxe. Şert û merc çi dibe bila bibe, tundî çi dibe bila bibe, têkoşîna me dê bi serkeftinê bi encam bibe. Em dê bi vîna xwe ya bi biryar vê tekoşîna xwe heta d8awî pêş bixin. Vîna azadiyê bi girtina nava çar dîwaran nayê girtin. Dibe ku em bi fîzîkî girtî bin, lê vîn û fikra me aza de. Em ji her demê bêtir azad in. Rojên ronî nêzîk in."
ENCU: GIRTIN NEBÛ ASTENG
Parlamenterê HDP'ê yê Şirnexê Ferhat Encu yê li Girtîgeha Hêjmar 1 a Tîpa F a Kocaeliyê jî ji girtîgehê peyam şand û got: "Vê kongreyê nîşan da ku girtin, binçavkirin û ceza bi tu awayî nikare bibe asteng. Bi tu awayi nikare tekoşîna me bişkîne û nikare gavan paşve bide avêtin."