ŞIRNEX - Li gundê Misirgê yê Cizîrê derket holê ku dikandarê bi navê Mahmut S. ê 42 salî 5 zarokên gund îstismar kirine. Mahmut S. ê xwe bi gotinên "Min bi nefsa xwe nekarî û bi ya şeytan kir " parast bi tawanbariya "îstismara zayendî" hat girtin.
Li gundê Misirgê yê navçeya Cizîra Şirnexê derket holê ku dikandarê bi navê Mahmut S. ê 42 salî, 5 zarokên keç ên temenê wan di navbera 13 û 15'an de diguhere bi îstismara zayendî re rû bi rû hiştiye. Bûyer li ser îxbara li Fermandariya Cendirmeyê ya navenda Cizîrê di 1'ê Kanûna 2017'an de derket holê û îfadeya Mahmut S., zaroka bi navê Ç.T. (15) û jina şahid N.M. hatin wergirtin.
TENÊ ÎSTISMARKIRINA ZAROKEKÊ GIRT SER XWE
Piştî îfadeya Serdozgeriya Komarê ya Cizîrê lêpirsîn da destpêkirin û Mahmut S. hat binçavkirin, ew anîn Miduriyeta Polîsan a Cizîrê. Mahmut S. ê piştî binçavkirina 3 rojan di 9'ê Sibatê ew şandin dozgeriyê. Mahmut S. li vir îstismarkirina Ç.T. qebûl kir.
'MIN BI NEFSA XWE NEKARÎ Û BI YA ŞEYTAN KIR'
Mahmut S. di îfadeya xwe ya li dozgeriyê de îstismarkirina zarokên bi navê D., S., G, û O. qebûl nekir û îfadeyên şahid ê wêneyên zarokan kişandibû jî red kir. Mahmut S. îddia kir ku Ç.T. dizî kiriye û bi gotinên, "Ez poşman im. Min bi ya şeytan kir. Bi dileke nepak nêzîkê kesekî nebûm. Min bi nefsa xwe nekarî" xwe parast.
DI DADGEHÊ DE ÎFADE GUHERT
Dozgeriyê bi daxwaza girtinê Mahmut S. sewqî Dadgeha Cezayê ya Sulhê kir. Mahmut S. li vir îfadeya dabû dozgeriyê red kir. Mahmut S. got ew ji ber di binçavan de westiyaye ev îstismar qebûl kiriye û xwe bi van gotinan parast: "Ev rewş qethiyen nerast e. Ji ber vê yekê min îfadeyên şaş dan."
JI BER DELÎLÊN ŞÊNBER HAT GIRTIN
Dadgeriyê bi rewşa delîlên heyî, îfadeya şahidan, delîlên şênber got Mahmut S. Ç.T. û zarokên din îstismar kirine û bi tawanbariya "îstismara zayendî ya li dijî zarokan" biryara girtina wî da.
MA / Gokhan Altay – Ozgur Paksoy