STENBOL - Nevzat Ozgen, di çalakiya şemiyê de bal kişand ser windakirina bavê xwe Fîkrî Ozgen ê 73 salî ku di 27'ê Sibata 1997’an de di bin çavan de hat windakirin got: “Di ser windakirina te re 21 sal derbas bûn. Sal bi sal êşa te zêdetir dibe. Em qet fêrî windakirin û tunebûna te nebûn. Dilê me bi tunebûna jan dide. Tunebûna te ji mirinê wêdetir e." 

 

Dayiken Şemiyê bi armanca aqûbeta windayan bipirsin, bi dirûşmeya "Faîl diyar in, winda li ku ne?" di hefteya 672'an de çalakiya li Qada Galatasarayê berdewam kirin. Dayikan di çalakiyê de pankarta “Faîl diyar in, winda li ku ne?" pirsîn. Dayikan piştî pankart vekir, qurnefil danîn ser çarika sipî û danîn ser pankartê. Dayikan vê hefteyê çîroka Fikrî Ozgen ê 73 balî ku dema di 27'ê Sibata 1997’an de li Koşuyolu ya Amedê diçû derman bistîne hat binçavkirin û windakirin pirsîn. 

 

HANIM TOSUN: EMÊ HETA DAWÎ LI WINDAYAN BIGERIN

 

Ewil Hevsera Fehmi Tosun ê hat windakirin Hanim Tosun axivî eû diyar kir ku ew dê dest ji lêgerîna windayan bernedin û heta dawî lêgerîna xwe berdewam bikin. Tosun, anî ziman ku wê berê mamê Fikrî nas dikir û wiha got: "Dema kurê wî çû hevdîtina wî ji kurê xwe re got ‘Tu sûcê min tune. Bila her dem serê te bilind be." Mamê Fikrî her dem serbilind geriya. Ji bo hemû windayên me serê me bilind e. Ger ku li vî welatî heq û hiqûq hebe divê kes neyên binçavkirin û neyên windakirin. Divê hesap ji kujeran bipirse. Heta em hebin emê hesap bipirsin." 

 

TANRIKULU: MIN NEKARÎBÛ MAMÊ FÎKRÎ RIZGAR BIKIM

 

Parlamenterê CHP'ê yê Stenbolê Sezgin Tanrikulu jî bi nameyekê peyam şand û got: “Fikrî Ozgen, mirovekî bêdeng bû. Lê mirovekî zana bû. Dema ji bo derman bistîne çû derve, ew li Torosa Spî suyar kirin û binçav kirin. Niha kurekî wî girtî ye û yek jî di goristanê de ye. Dozger tu tişt nekir. Di navbera odeya dozger û navenda JÎTEM'ê de 2 gav hebûn. Lê mixabin min kir û nekir, min nekarîbû dozger bişînim JÎTEM'ê. Min nekarîbû mamê Fîkrî  ji destê wan xelas bikim."

 

NEVZAT OZGEN: SIBAT MEHEK BÊ OGİR E GELO

 

Kurê Ozgen Nevzat Ozgen jî ji amedê nameyek ji Dayikên Şemiyê re şand. Endama Mirovên Şemiyê Taylan Bekin name xwend û got: "Her roja 27'ê Sibatê tê, Sûrê bajar ê bêdeng hêsiran dibarîne çemê Dîcleyê. Dicle bêdeng, xemgîn û pepûk. Sûr bê kes e. Mînareya çar ling li zarokên xwe yên çavreş û êtîm dinere. Cellatan ruh distendin li Ameda ku berxwedan lê berdewam dikir. Tu li Amed warê çand û welatê neheqî lê hatiye kirin hat kuştin. / Em hatin kuştin. Li vî bajarî bedelê xwebûnê hebû. Te jî pir xwestibû bibe xwe. Te ev daxwaza xwebûnê bi bedena xwe xist meriyetê. Em li pey te reviyan, lê me nekarîbû bêjin Bavo. Em nekarîbûn bigiriyana jî. Xewnên me jî hatin qedexekirin. Piştî tu çû me nekarîbû li stêrkên ezmanan jî binerin. Her dem giriyê de di zikê me de ma. Zarokên me kuştin û ji tere gotin qatîl. Zarok bi bavê xwe re dikuştin û bav bi zarokên xwe re. Carek din 27'ê Sibatê tê. Êşa dilê me hêj jan dide û bê tarîf e. Tunebûna te di qirika me de dibe girêka mîna kulmekê. Hesreta te di damara laşê me de digere.... Gelo Meha Sibatê mehek bê oxir e? Her ku tê bîra min êş û janê dide min. Dil bêzar û ji xwe aciz dike. Rêzdar bavo em te di bin qalikê daran de digerin. Di her koncal û kevirî de di her qadê de çavê me li te digere. Her bêruhê bi pêlên deryayê dikeve qraxa perê avê kelecanê dide me... 21 salin em fêri tunebûna te nebûn. Her diçe êş zêde dibe. Em qet fêrî tunebûna te nebûn. tunebûna te ji mirinê wêdetir e." 

 

‘ÇARESERÎ AŞTÎ EDALET Û HEQÎQET  E 

 

Daxuyanî vê hefteyê Mirovên Şemiyê Cihan Kaplan xwend. Kaplan, anî ziman ku bi kirinên OHAL'ê berpirsiyar nayên darizandin û bi rêbaza tundiyê êşan zêdetir dikin. Kaplan, anî ziman ku 672 hefte ne bawer dikin ku çareseriya pirsgirêkan bi aştî, edalet û heqîqetê pêk tê û wiha got: 

 

 

Kaplan, anî ziman ku Fîkrî Ozgen ji navçeya Pasûra Amedê bû û wiha got: “Ew û hevsera xwe bi hevre li gund dijiyan. Her dem di bin zextan de bûn. Gelek caran hatin binçavkirin. 3 caran mala wan hat şewitandin û xerakirin. Piştî mala Fikrî Ozgen bombe kirin, di sala 1992'an de ji gundê xwe yê 28 salan mixtarî dikir koçî Amedê kir. Dema Ozgen hat Amedê jî polîsan dest jê berneda. Dema Ozgen diçû îlan bistîne di 27'ê sibata 1997'an saet di 10.00'an de li Koşuyolu ji aliyê 4 kesên cilên sivil û bi bêtelan Fikrî Ozgen ew li Torosa spî suyar kirin û binçav kirin. 

 

HEMÛ HEWLDAN BÊ ENCAM MAN

 

Kaplan, anî ziman ku hevsera Ozgen Dilşah Ozgen ji bo dîtina hevserê xwe serî li her derê da, lê encam bi dest nexist. Kaplan, da zanîn ku dozger ji Dilşah Ozgen re gotiye Fîkrî Ozgen ne di bin çavan de ye û piştî lêkolîna malbatê, malbat fêr bûne ku Fîkrî Ozgen li navenda JÎTEM'ê di bin çavan de ye. Piştre di îtîrafên kadroyê JÎTEM’ê  Abdulkadir Aygan de jî hat diyar kirin ku Fikri Ozgen li Fermandariya JÎTEM'ê ya Amedê hatiye darizandin. 

 

Kaplan, anî ziman ku tevî malbatê di 20.08.1997'an de serî li DMME'ê dan jî lêklîn û lêpirsînek baş nehat kirin. 

 

Kaplan, anî ziman ku 21 sal derbas bûn, lê hêj encam nehatiye destxistin û xwest daxwaza malbata Ozgen a "Gorek me hebe" pêk bê.