WAN - Sewalkarên li Wanê ji ber krîza aborî êdî nikarin êm û kapekê ji heywanên xwe re bikirin. Her wiha sewalkaran anî ziman ku ji ber pere bi kesî re nemaye, kes heywanan jî nakire. 

 

Li Wanê sewalkar ji ber krîza aborî perîşan bûne. Ji ber ku fiyetên êm û kapekê biha bûye, nikarin bikirin. Her wiha sewalkaran diyar kir ku ji ber aboriya welatiyan nebaş e, kes nikare heywanan jî bikire. 

 

KÎSÊ ÊN 75 Û YÊ KAPEKÊ 40 LÎRE YE

 

Suleyman Gezer, diyar kir ku 40 sal in ew sewalkariyê dike, lê belê ji ber krîza aborî 3 sal in dixisire. Gezer destnîşan kir ku ji ber fiyetên êm û kapekê li ser hevdu tê zemkirin êdî hatine radeya ku nikarin sewalkariyê bikin. Gezer got: "Kîsê êm bûye 75 lîre û yê kapekê jî bûye 40 lîre. Her wiha alvêra heywanan jî pir kêm bûye. Rewşa bazarê qet nebaş e. Êdî em bi sewalkariyê jî nikarin debara xwe bikin." 

 

‘ÊDÎ EM BÎ KÎSAN ÊM DIKIRIN' 

 

Necatî Kiziltaş jî destnîşan kir ku bi salan e ew sewalkariyê dike, lê ev çend sal e hema bêje li Wanê gelek sewalkar top avêtine. Kiziltaş, diyar kir ku ev yek ji ber zemkirinê ye û got: "Berê me bi qamyonan êm dikirî, lê niha em bi kîsan dikirin. Heywana ku par min bi 10 hezar lîreyî difirot, niha bi zorê bi 5 hezar lîreyî difiroşim." Kiziltaş xwest rojek berî rojekê ev pirsgirêk bê çareserkirin. 

 

‘EV ÇI HAL E' 

 

Erdal Kiziltaş jî bertek nîşanî vê rewşê da û got: "Lîtreya mazotê bûye 6 lîre. Em destê xwe davêjin çi zemê dixwe. Îsal çandinî zêde bû, niha wexta hêrandina genim e. Lê niha kîsê kapekê 40 lîre ye, dê mehek şûnde bibe 50 lîre. Kîsê arvan ji 80 lîreyî bû 120 lîre. Ev çi halê e." Kiziltaş diyar kir ku eger wisa dewam bike ew ê dev ji sewalkariyê berdin. 

 

Tajdîn Înan jî got: "Salçeya ku ei nav xwarina me de ye ji 3 lîreyan bûye 10 lîre. Îjar li gor vê li rewşa bazara heywanan bifikirin."