Şêniyên Wanê OHAL’ê şîrove kir: Nav rabû lê cîsm disekine

  • rojane
  • 12:24 26 Tîrmeh 2018
  • |
img
WAN – Şêniyên Wanê diyar kirin ku OHAL li ser kaxizê rabûye û gotin: “Bi rayeya dan waliyan, OHAL’ê mayînde kirin. Guhertina navê OHAL’ê tu tiştekî ji bo me îfade nake. OHAL ranebûye, zext û zilm li ser civakê dewam dike.” 
 
Şêniyên Wanê diyar kirin ku her çiqas OHAL rabûbe jî lê bi guhertina nav OHAL didome û zextên li ser wan jî berdewam dike û bertek nîşanî rayeya dane waliyan dan. Ji şêniyan Hacî Îpek bal kişand ser guhertina OHAL’ê û wiha got: “Dibe ku nav guherîbe lê heman pergal didome û pêk tînin. Duh heta ez hatim Wanê sê caran hatim sekinandin û ser min lêgerîn kirin. Ev pergala Erdogan e. Niha erkek berifeh dan waliyan jî. OHAL ranebûye heman pêkanîn didomin. Tenê nav guherî lê tu tiştek neguherî. Pêkanîna zextan li ser civakê dewam dike. Birêkûpêk em nikarin biçin gundên xwe û derkevin zozanan.” 
 
'RAYEYA WALIYAN TIŞTEK ŞAŞ E’ 
 
Seyîthan Saribulak jî destnîşan kir ku OHAL nehatiye rakirin û got: “Heman OHAL disekine û zext jî didomin. Kes nikare daxwazên xwe bîne ziman. Wê rayeya dane waliyan şaş dibînim.” 
 
'QEDEXEKIRIN HATINA MIROVEK JI OHALÊ XERABTIR E’ 
 
Abdullah Kaçan jî têkildarî rayeya dane waliyan got: “Qedexekirina kesan a hatina bajaran, ji OHAL’ê wêdetir  û xerabtir e. Rayeya waliyan di OHAL’ê de jî ne ewqas bûn. Lê niha rayeya walî deh qat zêde bûn. OHAL’a rastî ranebûye.” 
 
‘OHAL RANEBÛYA BÊTIR DÊ BAŞTIR BIBÛYA’ 
 
Emîn Tîmur jî diyar kir ku her çiqas bêjin OHAL rabûye jî tu feyde li civakê nake û got: “OHAL nehata rakirin ji van pêkanîn û şertan baştir bû.” 
 
‘ZILM DEWAM DIKE’ 
 
Huseyîn Uzer jî da zanîn ku heman zext û zilm dewam dike û got: “Li cihek ku walî lê bikin desthilatdar û rayeya wî fireh bikin, dê hin bêtir OHAL, zext û zilm hebe. Wê her tişt li wir qedexe bûyî be û kes nikare li mafê xwe bigere.” 
 
Îdrîs Aslan jî anî ziman ku heta ew diçin zozanên xwe gellek caran tên lêgerînkirin û got: “Dibêjin OHAL rabû, lê me tu guhertinan nedît. Her tim li ser vê axê OHAL heye. Destûr nadin ku em sewalên xwe jî bi wesayît veguhezînin. OHAL ranebû, didome.” 
 
‘BI RAKIRINA OHAL’Ê MIROVAN DIXAPÎNIN’ 
 
Îlhan Kurtdogan jî da zanîn ku di fermiyetê de OHAL hatiye rakirin lê rayeyê polîs û leşker bikar tînin û got: “Însanan bi rakirina OHAL’ê dixapînin. Lê OHAL ranebûye. Gel ji ber vê rewşa OHAL’ê bêzar e û mexdûr bûye. Ne tenê niha bi salan e OHAL didome.” 
 
MA / Mujdat Can