ENQERE - Endamê Komîsyona Edaletê ya Meclîsê yê HDP'ê Abdullah Koç, diyar kir ku guhertinên der barê înfazê de ji bo hemû girtiyan ne derbasdar e û xwest li şûna guhertinê guhertina çend zagonan efûya giştî têxin rojevê.
Piştî vîrûsa corona (Kovid-19) li tevahiya cîhanê û Tirkiyeyê belav bû, hikûmetê hêj nû nû ev mijar xist rojeva xwe. Heta niha li Tirkiyeyê li gorî daxuyaniyên fermî 21 kes bi şewba vîrûsê mirin û 947 kes jî bi şawba vîrûsê ketine. Lê li gorî niqaşên ne fermî ev hêjmar qat biqat zêdetir e. Bi taybetî kesên nexweş, kal, pîr, zarok di koma rîskê de cihê xwe digirin. Ji ber ku li girtîgehên Tirkiyeyê zêdeyî Hezar û 500 girtiyên nexweş hene fikarên malbatan jî zêdene û dixwazin girtiyên siyasî yên nexweş û temenê wan mezin serbest bêne berdan. Lê di pakêta duyemîn a darazê ya AKP’ê de ji bo daxistina ceza tu guhertin tune ye. Zagona darazê ya têkildarî vîrûsa Kovid-19'an piştî bi partiyên siyasî re hat parvekirin, dê halê dawî parve bikin. Guhertina ji bo daxistina înfazê jî tê gotin ku dê di bin “3’emîn pakêta darazê" de bê niqaşkirin û bînin rojeva meclîsê.
Têkildarî mijarê Endamê Komîsyona Edaletê ya Meclîsê yê HDP'ê Abdullah Koç, diyar kir ku guhertinên der barê înfazê de ji bo hemû girtiyan ne derbasdar e û xwest li şûna guhertinê guhertina çend zagonan efûya giştî têxin rojevê. Koç, anî ziman ku piştî bertekên civakê yên der barê mijarê de zêde bûn, îqtîdarê hêj nû ev yek kir rojeva xwe û wiha got: "Divê girtî bi lez serbest bêne berdan. Daxistina înfazê divê ji bo kesên sûcê wan teqes bûye derbasdar be. Bi taybetî ji bo parlamenter, hevşaredar, hevserok, endam û rêveberên partiyê, rojnameger, nivîskar û rewşenbiran derbasdar be. Nihabi hezaran endam û rêveberên partiya me girtî ne. Ev hevalên me ji ber siyaset kirine hatine girtin. "
Koç, anî ziman ku ger şewba vîrûsê li girtîgehan belav bibe dê bi xwe re felaketê bîne û wiha got: "Ger ku îqtîdarasiyasî gavên erênî bavêje dê rê li pêş vê felaketê bigire. Ger ku ev vîrus derbasî girtîgehan bibe êdî dê nikaribin tedbîrê bistînin. Ji ber ku hêjmarek pir zêde girtî ne. Li kawîşên şûna 5 kesan 20 girtî dimînin. Divê ev rewş li ber çavan bê girtin. Çareserî ne guhertina çend zagonan e. Çareserî efûya giştî ye. Welatên wekî Îranê girtiyên siyasî efû kirin. Divê hemû girtiyên siyasê bên efûkirin. Divê girtiyên nexweş bi lez û bez serbest bêne berdan.
MA / Diren Yurtsever