AMED - Di danişîna doza derbarê Rojnameger Kîbriye Evren a hatibû vekirin de, biryara şertê kontrola edlî hat rakirin.
9’emîn danişîna doza bi îdîaya “Endamtiya rêxistinê” û “Propagandeya rêxistinê kirin” a darbarê rojnameger Kîbriye Evren de hatibû vekirin, li 5’emîn Dadgeha Cezayê Giran a Amedê pêk hat. Evren ji ber pirsgirêkên xwe yên tenduristiyê nekarî beşdarî danişînê bibe. Parêzerên wê Pîrozhan Karalî û Resûl Tamûr di danişînê de amade bûn.
Polîsan berî danişînê li ber Edliya Amedê û di korîdora dadgehê de ewlekariyek zêde girtin. Hat dîtin ku polîsan danişîn şopandin û mînakeke girteka biryara danişînê girtin.
DAXWAZA DEMEK DIRÊJ
Parêzerê Evren Resûl Tamûr, di danişînê de axîvî û diyar kir ku muwekîla wî ji ber pirsgirêkên xwe yên tenduristiyê nekarî beşdarî danişînê bibe. Tamûr, rapora tenduristiyê ya muwekîla xwe pêşkêşî dadgehê kir û wiha got: “Li gorî raporê îhtîmala ku muwekîla min di nava 4 mehan de, dîsa bê emeliyatkirin heye. Ji ber vê yekê em dixwazin ku demek dirêj ji bo dadgeh kirina wê bê dayîn. Di danişîna bê de emê muwekîla xwe beşdarî danişînê bikin.”
BIRYARA KONTROLA EDLÎ HAT RAKIRIN
Şandeya dadgehê, biryara şertê kontrola edlî ya darbarê Evren de rakir û biryar da ku qedexeya wê ya çûyîna derveyî welat dewam bike û danişîn taloqî 14’ê Tîrmehê kir.