ŞIRNEX - Hevseroka KCD'ê Leyla Guven di mîtînga Jinan a 8'ê Adarê ya li Navçeya Sîlopyayê de axafî u diyar kir ku ji bo jinan bêdeng bikin Dayika Taybet Înan, Sêvê li sîlopî qetil kirin û 3 jinên siyasetmedar li Parîsê qetil kirin û wiha got: "Lê em îro bi coşek mezintir li vir in. Em bêtir bi hêz bûne. Em îro pir bi şens in. Hemû cîhan me temaşe dike. Hemû cîhan qala têkoşîna jina Kurd dike." Guven bal kişand ser tecridkirina Ocalan û anî ziman ku bahar nêzîk e û aştî bi vekirina deriyê Îmraliyê pêkan e. 

 

Li navçeya Sîlopî ya Şirnexê, mîtinga 8'ê Adarê Roja Jinan a Cîhanê, bi tevlêbûna hezaran jin û bi coşek mezin dest pê kir. Jinan bi cil û bergên xwe, pankart û dowîzên xwe û bi dirûşmeyan qada mîtîngê neqişandin. Mîtînga di pêşengiya Tevgêra Jinên Azad (TJA) û Meclîsa Jinan a Partiya Demokratîk a Gelan (HDP) li navçeya Sîlopî hat organîzekirin, bi axaftinan dest pê kir. Mîtînga ku li qada Parka Newrozê bi dirûşmeya "Em berxwedanê bi rêxistin dikin, ber bi azadiyê ve dimeşin" hat vekirin. 

 

'BI KUŞTINÊ NIKARIN VÎNA JINÊ TUNE BIKIN'

 

Ewil Hevseroka KCD'ê Leyla Guven axivî û hemû jinên li qadê û jinên di têkoşîna azadî û demokrasiyê de jiyana xwe ji dest dane yek bi yek bibir anî. Guven diyar kir ku ji bo jin li mala xwe rûnên Dayika Taybet qetil kirin û wiha got: "Em îro li qadan in. Ji bo em ne li qadan bin Dayika Taybet qetil kirin. Dîsa li Parîsê ji bo jin siyasetê nekin û dîplomasiyê nekin qetilkirin. Em dibêjin bi kuştinê û qetilkirinê nikarin vîna me mişkinin."  

 

'BI TECRÎDÊ DIXWAZIN DENGÊ KURDAN QUT BIKIN' 

 

Guven, anî ziman ku îro li her derê li jinên Kurd temaşe dikin û dibêjin "Jinên Kurd li qadan çi dixwazin?" û wiha axivî: "Kurdan tu carî sînor nas nekirine. Niha li ser erdnîgariya me tecrid heye. Tecrîdê li ser Birêz Ocalan dimeşînin. Dixwazin dengê Kurdan di şexsê Ocalan de qut bikin. Em dibêjin hev hewldan vala ye. Hevalê me Zulkuf, Zehra û hevalên zindanê bi bedena xwe li dijî terîdê xwe feda kirin. Em dibêjin ku hûn aştiyek mayinde û bi rûmet dixwazin kerem bikin berê xwe bidin Îmraliyê." 

 

'EM JINÊN KURD BI ŞENS IN'

 

Guven, anî ziman ku jinên Kurd bi şens in û wiha berdewam kir: "Em jinên Kurd pir bi şens in. Dibe ku me gelek zor û zahmetî dîtibe. Dibe ku me gelek êş û jan dîtibe. Lê em pir bi şens in. Îro hemû cîhan qala Kurdan û têkoşîna jina Kurd dikin." 

 

Guven, bal kişand ser qedexeya li ser ziman jî û wiha lê zêde kir: "Îro dîsa dixwazin kurdî qedexe bikin. Em dibêjin Em kurd in. zimanê me kurdî ye û welatê me kurdistan e." 

 

Guven, bal kişand ser coş û tevlêbûna mîtîngê û wiha got: "Ev tevlêbûn hêza jinê û vîna jinê nişan dide. Biryara jinê û têkoşîna jinê nîşan dide. Ger ku em hev bigirin u tifaqa xwe xurt bikin. Em qada 8'ê Adarê biginîn qada Newrozê em ê serkeftina xwe xurttir bikin. Em ê bersîv bidin wan. Kurdan li Enqereye di Kongreyê de bersîv dan. 30 hezar di kongreyê de  kom bûn. Gelê Kurd di kongreyê de bi yek dengi gotin "Bijî Serok Apo" û peyama xwe dan. 

 

'ÇI KARÊ WE LI IDLIBÊ HEYE' 

 

Guven, polîtîkayên hikûmetê yên li Idlibê jî rexne kir û wiha bi dawî kir: "Çikarê we li Idlibê heye. Hûn çûn Idlibê esker mirin. Eskerên mirine jî gune ne. Giş zarokên feqîran e. Bila kezeba dayikan neşewite. Çi karê we li wir heye. Tev zarokên feqîran in. Werin welatê xwe. Em dibêjin ji axa xelkê derkevin. Em dibêjin êdî bêyî vîna Kurdan nikarin gavan bavêjin. Edî ev dema bê Kurdan gavan bavêjin bi dawî bû. Em dibêjin dayikno vaya Bahar hatiye. Li çiya Bahar hatiye. Em dixwazin carek din deriyê Îmraliyê vebe. Bila Birêz Ocalan azad bibe. Di nava civaka xwe de xebatda xwe bimeşîne. Bila muzakere dest pê bikin. Em hevî dikin di rojên pêş de rojên muzakereyan dest pê bike û rojên xweş li benda me ne. Jin jiyan azadî"