STENBOL – Parêzera MLSA’yê Zelal Pelîn Dogan binçavkirina rojnamegerên li Edîrneyê nirxand û got peywendiya her xebatên çapemeniya muxalîf bi TMK’ê ve girê didin. Sekretera Giştî ya Basin Îşê Ozge Yurttaş jî got dixwazin bi binçavkirinan ser heqîqet û pêkanînên derveyî mirovan veşêrin.
Rojnameger li ser xeta sînorê Edîrneyê çûyîna penaberan dişopînin. Nûçegihanên Ajansa Mezopotamyayê (MA) Îdrîs Sayilgan û Nacî Kaya dema li Edîrneyê geşedanên têkildarî penaberan dişopandin di 29’ê sibatê de bi angaşta “Li herêma qedexe kişandinê kirine” hatin binçavkirin. Sayilgan û Kaya bi boneya derbarê wan de biryara “qedexeya derketina derveyî welat” heye ji dozên dihatin darizandin bi SEGBÎS’ê tevlî dadgehan kirin. Îdrîs Sayilgan ê ku beşdarî dadgeha Erziromê bû ji aliyê vê dadgehê ve hat girtin. Kaya jî beşdarî dadgeha Aydinê kirin û tevî dadgehê wî berda jî 3 roj in di binçavan de tê ragirtin.
Her wiha nûçegihanê qenala Rûdawê Rawîn Stêrk û kameravan Mehmet Şîrîn Akgun jî li Edîrneyê hatibûn binçavkirin û hêj di binçavan de tên ragirtin. 9 rojnamegerên dîsa li Edîrneyê hatibûn binçavkirin piştî îfadeyên wan hatin wergirtin hatin berdan.
Ji Komeleya Xebatkarên Medya û Hiqûqê (MLSA) parêzer Zelal Pelîn Dogan û Sekretera Giştî ya Basin Îşê ya DÎSK’ê Ozge Yurttaş binçavkirina rojnamegeran nirxandin.
‘BINÇAVKIRIN Û GIRTIN DIJ HIQÛQÎ YE’
Parêzer Zelal Pelîn Dogan da zanîn ku binçavkirin û girtina rojnamegerên li Edîrneyê li dijî hiqûqê ye û got: “Zextên li ser çapemeniyê ya li Tirkiyê di rapora dîroka 2018’an a Konseya Ewropa de cih digire. Rojnameger ji ber xebatên pîşeya xwe ji azadî û mafên xwe bêpar dimînin. Ev jî îşaretî wê yekê dike ku hêj rewşa awarte didome. Li gorî raporên rêxistinên mafê mirovan gelek rojnameger girtî ne û hêj tên binçavkirin. Îsrîs Saygilgan ji dosyeya Mûşê jê dihat darizandin hatibû berdan. Lê piştî berdana wî derbarê wî de du angaştname hatine amadekirin û dozek nû hat vekirin.”
‘BI TMK’Ê XEBATA MEDYA MUXALÎF TÊ ASTENGKIRIN’
Dogan diyar kir ku li Tirkiyê di navbera rojnamegeran de cudakarî tê çêkirin û got: “Dixwazin di navbera medya navendî û medya muxalîf de ferqekê pêk tînin. Peywendiya her cûre xebatên medya muxalîf bi Qanûna Têkoşîna Terorê (TMK) re peywendîdarkirin. Heçkû armanc ew e ku rastî neyên ragihandin. Ji bilî vê ne tiştek e.”
‘DIXWAZIN PÊKANÎNÊN WAN DIJ MIROVANE NEYÊN EŞKEREKIRIN’
Sekretera Giştî ya Basin Îşê ya DÎSK’ê Ozge Yurttaş jî got îqtîdar dixwaze tiştên li ser sînor diqewimin asteng bike û nehêle çapemenî ragihîne. Tirkiye penaberan bikar tîne. Dixwaze sûdê ji vê yekê bigire. Di pêvajoya manipülasyona nû de ser heqîqetê tê girtin. Rojnamegerên diçin ser sînor heqîqeta wir radigihînin. dixwazin bi binçavkirinan ser heqîqet û pêkanînên derveyî mirovan veşêrin. Ev konseptek taybet e. Bi taybetî jî li dijî rojnamegerên kurd konseptek di dewrê de ye û polîtîkayek birêve dibin. Em ê her tim li pişta rojnamegeran bin.”