STENBOL – Jina 15 sal in di sektora înşaetê de karê teknîkeriyê dike Derya Ulu, diyar kir ku rola cînsiyatperestî li wan tê ferzkirin û ew li dijî vê yekê têdikoşin. Ulu, anî ziman ku mafê wan tê xwarin û dixwazin wekî mêr bijîn. Ulu, li dijî vê hişmendiyê bang li hemû jinan kir ku di 8'ê Adarê de dakevin qadan û ji bo mafê xwe têbikoşin.
Di nava karan de herî zêde di karê înşaetê de rola zayendiya civakî li ser kesan tê ferzkirin. Di karê înşaetê de rola mêr bêtir serdest e. Jina di nava kar de jî rastî tundiyê tê. Li Tirkiyeyê yekem endezyara înşaetê Sabiha Gurayman tê zanîn. Yek ji jinên di nava karê înaşetê de teknîkeriyê dike Derya Ulu ya 15 salin karê înaşetê dike ye. Ulu li ser karê înşaetê û rola jin û mêr rawestiya. Ulu, ji 2002'an heta niha karê teknîka înaşetê dike. Ewil di karê îmalata makîneyan de kar kir. Ji ber jin bû sîgortaya wê nehat razandin. Zextên derûni li ser wê hatin kirin û bi awayekî veşarî gotin 'tu nikare vî karî bike' Bi van zextên derûnî xwestin wê paşve bikişînin. Ulu anî ziman ku jinên di vê sektora kar de dixebitin rastî hemû tundiyên derûnî û devkî tên û wiha got: "Ji bo jinên vî karî dikin li mala xwe vegerin hemû cureyên tundiya derûnî li wan tê kirin. Dibêjin 'tu jin e çi karê te li vir heye? Tu tiştekî ji vî karî fam neke? Here malê. Jin bêtir li beşa ofisê kar dikin. Naxwazin ku li qadên înşaetê kar bikin. Bêtir karên projeyan, şêwirmendiya buha û firotinê de cih digirin. Dixwazin wekî mêr hişk be. Bike qêrîn û hêrs bibe. Dixwaze wekî mêr zordest be û bi zorê hin tiştan bide qebûlkirin. Jinên Naif nikarin bi hêsanî di sektora înaetê de kar bikin. Ji ber ku dixwazin wekî rola mêr tev bigerin."
'MÎN DÎT KU BÛME WEKÎ MÊR'
Ulu, anî ziman ku dema li gorî rola jinê tev negere û wekî rola li ser wê tê ferzkirin tev digere, ev yek wê bêzar dike û wiha got: "Min xwe wekî kesa bindest û nayê qebûlkirin hîs dikir. Piştî demekê ji bo ez vê rewşê ji ser xwe bavêjim, ez wekî mêr tev geriyam. Min dît ku çiqas bêtir bikim qêrîn û xwe hêrs bikim bêtir li ber çavan têm girtin. Piştî ez fêrî kar bûm û min li ser kar serdestî kir, min dît ku ez bûme wekî mêr. Piştî min ev yek ferq kir, min nasnameya jinê derxist pêş. Vê vê yekê baweriyek da min. Girîng e ku mirov hem wekî jinekê û hem jî wekî karkerekê mafê xwe zanibe. Mêrek karê xwe fêr dibe û dike. Lê jin 3 pîşeyan fêr dibe û dike. Mînak ez teknikerê makînê me, lê di heman demê de ez karê muhasebê û karê firotinê jî dikim. Ez tişteki nekim jî dixwazin ez çayê çêkim û buroyê paqij bikim. Lê vê yekê ji mêrekî naxwazin. Jin ger ku li sektora înşatê 3-5 karan bi hevre bike wê demê dikare kar bike. Ne wisa be cih jêre tune ye."
Ulu, xwest beri her tiştî jinên di sektora înaetê de kar dikin wêrek û ji xwe bawer bin û wiha lê zêde kir: "Eger jin di sektora înaşetê de çalak bin dê karên xweşik pêk bînin. Jin her tem ava dikin û kom dikin. Cihê destê jinê digêjê her tem bereket û serkeftin heye. Jin pêjeroja mirovan difikirin û karê înaşetê dikin. Ji ber vê yekê girîngiyê didin karê xwe. Divê jin di vê qadê de çalak cihê xwebigirin."
Ulu herî dawî bang li hemû jinan kir û xwest ji bo 8'ê Adarê li qadan dengê xwe bilind bikin û têkoşîna xwe xurt bikin.