MÊRDÎN - Li Taxa Dûnaysir a Qoserê, hin kesan hewl da ku welatiyê bi navê Selahattîn Aksoy birevînin. Aksoy, xwe ji wesayîta ku lê hat siwarkirin avêt û kesên ku hew dan wî birevînin jî ji ber ku cîranên wî li hewara wî hatin reviyan. Aksoy, diyar kir ku di destên kesên ku hewl dane wî birevînin de tiştekî mîna bêtelê hebûye û ji ber vê yekê ji polisan bi guman e.
Di 26'ê sibatê de hin kesên nasnameya wan ne diyar hewl da ku welatiyê bi navê Selahattîn Aksoy ku li Taxa Dûnaysir a Qoserê dijî birevînin. Serê sibehê saet derdora 08-30'an dema ku Aksoy ji mala xwe derketiye û xwestiye biçe karê xwe, 3 kesên di wesayîta bi pîleqeya 35 a merqaya Renault Symbol a bi rengê gewr de pêşiya wî digirin û dixwazin wî bi zore bikin wesayîtê. Li gorî vegotinên Aksoy; dema ku nexwestiye li wesayîtê siwat bibe, kesên ku wî pincirandine zorê danê. Li ser vê yekê Aksoy qebûl kiriye ku bikeve wesayîtê û dema ku wesayît ketiye tevgerê xwe jê avêtiye. Ji ber vê yekê serê Aksoy şikiyaye û di pişta wî de birîn çêbûne.
Aksoy, piştî bûyerê çûye Miduriyeta Polisan a Qoserê û giliya kesên ku hewl dane wî birevînin kiriye. Di rojên pêş de dê bi parêzerê xwe re li Serdozgeriya Komarê ya Mêrdînê jî giliya kesên ku helw dane wî birevînin bike. Aksoy, têkildarî tiştên ku hatine serê wî ji Ajansa Mezopotamyayê (MA) re axivî.
'DI DESTÊ WAN DE TIŞTEKÎ MÎNA BÊTÊLÊ HEYE'
Aksoy, diyar kir ku dema serê sibehê ji mala xwe derketiye, wesayîta ku pêşiya wî girtiye li serê kuçeyê sekinîbûye û wiha got: "Çawa ku hatim cem min, ji min re gotin, 'siwarî wesayîtê bibe'. Min jî ji ber ku wan nas nekir got ku siwar nabim û sedemê pirsî. Bi israr xwestin ez siwar bibim. Di destê kesekî de tiştekî mîna bêtêlê hebû. Lê min fêm nekir ku bêtêl e ya na. Guman dikim ku polis bin. Min pîlaqeya wesayîtê baş nexwend. Di serê her se kesên di wesayîtê de kom hebû. Kesê ku wesayîtê diajot montê leşkerî lê bû û bi rû bû. Kesên din kî qemer bûn. Qama wan di navbera 1.70 û 1.85'an de bû."
'BILA BÛYER bE RONÎKIRIN'
Aksoy, destnîşan kir ku piştî hilbijartinên 7'ê Hezîrana 2015'an de bi ser mala wî de hatiye girtin û 9 mehan di girtîgehê de maye û ev tişt anî ziman: "Heta ku çûm girtîgehê min hê zanibû ku hatime girtin. Pişt re min beraet kir. Ji ber ku bûyera niha di şube vê bûyerê bi guman im. Li herêmê qamerayên MOBESE'yê hene. Heke li wan bê nêrîn dê kesên pêşî li min girtin û hewl dan min birevînin bên tespîtkirin. Dixwazim bûyer bê ronîkirin û berpirsyar derkevin holê."
MA / Ahmet Kanbal