Tevgera Jinên Azad (TJA) û Meclîsa Jinan a HDP'ê ya Sêrtê starta 8'ê Adarê Roja Jinan a Cîhanê li geliyê Botanê dan. Parlementera Partiya Demokratîk a Gelan (HDP) ya Sêrtê Meral Daniş Beştaş, Hevşaredara Sêrtê Berivan Helen Işik, Dayîkên Aşitiyê û aktivîstên TJA'yê tevlî daxuyaniyê bûn. Di daxuyaniyê de pankarta "Jin bi têkoşîna xwe azad dibe,bi azadiyê mezin dibe " hate vekirin. 

 

 Daxuyanî ji aliyê Parlementera Partiya Demokratîk a Gelan (HDP) a Sêrtê Meral Daniş Beştaş ve hat dayîn. Meralê bal kişand ser çêkirina bendavan û got ku îktîdara AKP'ê  li ser navê xweşikbûnê xwezaya dîrokî dikuje û got:" Em sarta xwe li gundên ku di bin avê de ma ne didîn. Me ev der hilbijart. Ji ber ku wekî hûn jî dibînin li vir komkujiyeke xwezayî heye. Li gel vê komkujiyê wê êşên giran bên kişandin. Komkujiya xwezayê li ser xweşikbûnê pêk tê. Dixwazin bi vê polîtîkayê qirkirina xwezayê meşru bikin. Wekî Heskîf geliyê Botan jî bi tunebûnê re rû bi rû ye. Li ser erdnîgariya me li dijî hebûna me êrîşên giran hene. Em vê qebûl nakîn. Em ê li dijî talankirina xwezayê,dîrokê û çandê li her deran tebikoşîn û  li dîroka xwe,xwezaya xwe û  çanda xwe xwedî  derkevîn. Em ji Geliyê Botanê bang dikîn, Ji Îdlîbê derkevin ew der ne xaka Tirkiyeyê ye. Em jin li dijî mirinê jiyanê û li dijî şer aşitiyê diparêzîn."

 

LI GELIYÊ BOTANÊ STARTA DA 

 

Beştaş, bang li hemû jinan kir ku li qadên 8'ê Adarê  xwedî mafên xwe derkevin û wiha bi dawî kir:" Rojeva me ya herî sereke mafên jina ye. Em jin dixwazîn bijîn. Îro li her derên Tirkiyeyê jin tên kuştin û bi tundiyê re rû bi rû ne. Em jin pêşengên civakê ne. Heta ku em jin azad nebin û em wekhev nejîn demokrasî ne pêkan e. Polîtîkayên AKP'ê li dijî azadî û wekhêviya jinan e. Lê em wekî Meclîsa HDP'ê li her deran em ê gotina xwe bibêjîn. Em li Geliyê Botan starta xwe ya 8'ê Adarê didîn û bang li hemû jinên Sêrtê dikîn ku werin em mil bi mil tebikoşîn. Em li vir in û em ê li her derê bin." 

 

Daxuyanî  bi dirûşma "Jin Jiyan Azadî"  bi dawî bû. Piştre jinan  ji bo ku balê bikşînin ser qirkirina xwezayê qurnafîl avêtin bendavê. 

 

ŞIRNEX

 

Aktivîstên Tevgera Jinên Azad (TJA) di çarçoveya çalakiyên 8'ê Adarê Roja Jinên Cîhanê de, li avahiya Rêxistina HDP'ê ya Hezexê li hev civiyan. 

 

Hevşaredara Hezexê Songul Erdem a qayûm tayînê cihê wê hat kirin, spasiya jinan kir û jin vexwendin mîtînga ku di 8'ê Adarê de bê lidarxistin. 

 

‘DIVÊ EM TECRÎDÊ RAKIN'

 

Parlamentera HDP'ê ya Şirnxê Nûran Îmîr jî, bal kişand ser girîngî û wateya 8'ê Adarê Roja Jinên Cîhanê. Îmîr, şewata li Gireva Îmraliyê bibîr xist û wiha got: "Şewata îro li Îmraliyê rû da, ji ber xwe ve rû nedaye. Divê em jin, di vê 8'ê Adarê de, bibin dengê Îmraliyê, Kurdistan û Tirkiyeyê. Xwedî derketina ziman, çand û erdnîgariya xwe, di heman demê de xwedî derketina li Ocalane."

 

Îmîr, behsa tecrîdkirina Ocalan jî kir û wiha dawî li axaftina xwe anî: "Heya ku rêberê me dibin tecrîdê de be, ev xwîna li Rojhilata Navîn dirije ne pêkane ku raweste. Divê tecrîda li Îmraliyê rabe, da ku Rêberê PKK'ê Abdullah Ocalan jî karibe rol û mîsyona xwe bilîze. Em bang li hemû jinan dikin ku di 8'ê Adarê de biherikin qadan."

 

Piştî axaftinên hatin kirin, jinên ku kincên herêmî li xwe kiribûn, li ber stranan guvend gerandin, li çepikan xistin û tilîlî berz kirin. 

 

RIHA 

 

Platforma Jinan a Rihayê li Komelaya Jinan a Jiyanê starta 8’ê Adarê roja jinan a cîhanê da. Parlementera Partiya Demokratîk a Gelan (HDP) Ayşe surucu, aktîvîstên Tevgera Jinên Azad (TJA), Sendîkaya Tenduristiyê (Ses) û bi jimarek zêde jin tevli daxuyaniyê bûn. Li ser navê Platformê ji baroya Rihayê Parêzer Mîhrîban Çelîk axivî û got em ê 8’ê Adara 2020’an diyarî Gulîstan Dokû bikin. Mîhrîban wiha wiha berdewam kir: “Emê di 1- 7’ê mehê de programek têr û tijî derbas bikin, em ê weke jinên bi hêz yên Rihahyê ji bo têkoşîna azadiya  jinê bigihê astek herî mezin di berxwedanê de bin.”

 

‘EMÊ 8'Ê ADARÊ DIYARÎ GULÎSTAN DOKU BIKIN'

 

Mîhrîban di berdewamiya axaftina xwe de dîroka 8'ê Adarê bi bîr xist û wiha got: "149 jinên di têkoşîna azadî, kedê, wekhevî û demokrasiyê de mafê xwe yê grevê pêk dianîn ku ji aliyê karsazan ve di fabrîqayê de hatin girtin û hatin şewitandin. Lê Çiqas êriş li dijî me pêk bên jî em dizanin ku jin hêza xwe ji yekitiyê û rêxistinbûnê digirin.  Em ê bi vê zanabûnê yekbûn û hêza xwe bikin yek û rêxistina xwe mezin bikin. Em hemû jinên di têkoşîna azadiyê de ked dane silav dikin û berxwedana wan bi rêz darî bi bîr tînin. Meryem herî dawî da diyarkirin ku ew 8’ê Adarê diyarî Gulîstan Doku dikin.”

 

Daxuyanî bi dirûşmên "Jin jiyan azadî" bi dawî bûn

 

COLEMÊRG

 

Meclîsa Jinê ya Partiya Demokratîk a Gelan (HDP) ya Colemêrgê jî, bi boneya 8’ê Adarê Roja Jinên Cîhanê li avahiya bajêr civîna çapemeniyê li dar xist. Hevseroka HDP’ê ya Navenda Navçeyê Sînem Seven, Hevşaredara Colemêrgê Humeyra Armût a qeyûm tayînê cihê wê hat kirin û gelek jin beşdarî civînê bûn. 

 

Jinan bal kişandin ser wateya dîrokî ya 8’ê Adarê û bernameya xwe ya çalakiyan a heftiyekê li bajêr pêk bînin aşkere kirin. 

 

EDENE 

 

Aktivîstên TJA û Meclîsa Jinê ya HDP'ê, bi wesileya heman rojê li bazar, gund û navçeyên Edeneyê geriyan û belavokên 8'ê Adarê belav kirin. Jinên ku rastî eleqeyek mezin a gel hatin, bang li jinan kirin ku beşdarî mîtînga li Qada Ugur Mumcu û meşa di 8'ê Adarê de, saet 13.03'an li ser Pira Kasim Gulek bê lidawerxistin bibin, kirin.

 

ÊLIH 

 

Tevgera Jinên Azad (TJA), li navçeya Hezo ya Êlihê bi boneya 8'ê Adarê şahiyek li dar xist. Şahî li baxçeyê çay a Hezoyê pêk hat. Rêxistinên HDP'ê û DBP'ê yên bajêr, Aktivîstên TJA'yê, Dayikên Aştiyê û gelek jin beşdarî şahiyê bûn. Jinan li ber stranên Koma Erbanê ya Koma Şehîd Mîzgîn guvend gerandin û dirûşme berz kirn. Di dawiya şahiyê de jî jinan tilîlî berz kirin û li çepikan xistin.