Di êrîşa balafirên şer ên Rejîma Sûriye û Rûsya de li Idlibê 36 eskerên TSK'ê jiyana xwe ji dest dan. Bi dehan esker jî birîndar bûn. Di rojeva hemû cîhanê de şerê li Idlibê û polîtîkayên dinavbera Tirkiye, Rûsya û Nato de tên niqaşkirin. Piştî 36 eskerên TSK'ê li Idlibê hatin kuştin, Tirkiye deriyê sînoran li penaberan vekir. Têkildarî geşedanên li Idlibê û polîtîkayên Tirkiyeyê yên li ser Sûriye û Idbilê Nivîskar û Rojnameger Yusuf Karakaş, nirxandin kir. Karataş, anî ziman ku îqtîdara AKP'ê 9 salin li herêmê polîtîkaya "Ez bibim welatê serwer ê herêmê" dimeşîne û wiha got: "Niha Tirkiye li Idlibê gihiştiye dawiya vê polîtîkayê. Eskeren li Idbilê di navbera rejîma Sûriyeyê û hêzên komên çekdar û cîhatkar de wekî mertal bikar tînin. Daxuyaniyên Rûsya yên têkildarî mijarê balkêş in." 

 

Karataş, anî ziman ku hem li derve û hem jî li hundir pêdivîya Tirkiyeyê bi polîtîkayên aştiyane heye û wiha got: "Ger ku Tirkiye li pey armancên cîhatkaran bireve tiştekî bi dest naxe. Niha îqtîdara AKP'ê ne xwedî aqilê ku pirsgirêkan bi rêya aştî û aramî çareser bike ye. Îqtîdara Erdogan li herêmê di pêşiya Rêbertiyê de ye. Bi îddîaya bibe serwer û rêberê herêmê mudaxaleyî Sûriyeyê kir. Îqtîdara Erdogan di 3 mijaran de bi ser neket. Yek jê xwest li gorî xwe pirsgirêka Kurd çareser bike. Ya duyemîn xwest mudaxaleyî Kurdên Sûriye bike û ya sêyemîn jî xwest destkeftiyên Kurdan ji holê rake. Ji bo vê yekê jî xwest cîhatkaran li herêmê belav bike. Tirkiye bi van polîtîkayan winda dike. Pêdivî ji aqilê çareseriya bi aştiyane heye.  Lê mixabin îro ev aqil di AKP'ê de tune ye. 

 

'FÊDEYA TIRKIYE DI KETINA AXA SÛRIYEYÊ DE TUNE YE'

 

Karataş, anî ziman ku tu fêdeya Tirkiyeyê di ketina axa Sûriyeyê de tune ye û wiha got: "Esker di navbera artêşa Sûriyeyê û cîhatkaran de kirin mertal. Li şûna eskerên nokteyên çavdêriyê vekişîne, dijberî vê yekê bêtir esker sewqî herêmê kirin. Esker li Idlibê kirin hedef. Rûsya diyar kir ku eskerên hatin kuştin ne li nokteyên çavdêriyê bûn, li nokteyên cîhatkaran bûn. Ev nîşan dide ku aşkere piştgirî daye wan. " 

 

Karataş, da zanîn ku îqtîdar bi aqilê Osmaniya Nû tev digere û ji ber li Idlibê bi cîhatkaran re hevkarî kiriye li Idlibê asê maye. Îqtîdara Tirkiyeyê ji sala 2011'an heta niha dixwaze mudaxaleyî herêmê bike. bi feraseta "Osmaniya Nû" tev digere. Dixwaze dîsa bibe xwediyê axa Osmanî ya berê. 9 salin li Sûriyeyê vê polîtîkaya serweriyê dimeşîne. Lê îro ev polîtîka li Idlibê asê maye û nikare tev bigere. Dixwaze li Idlibê bi rêya van hêzên cîhatkar Kurdên Rojava tasyifê bike. Me dit ku hêzên cîhadîst ji Haleb, Xuta Rojhilat û Derayê ji gelek bajarên Sûriyeyê komên çekdar anîn Idlibê kom kirin.  Ji ber Tirkiye bi komên çekdar re di nava hevkariyê de bû, asê ma." 

 

NIKARE BI NATO ÇARESER BIKE

 

Karataş, anî ziman ku Tirkiye dixwaze bi NATO vê meseleyê çareser bike û got: "Eger ku NATO têkeve navberê dê pirsgirêk bêtir mezin bibe. Tirkiye dê bêtir asê bimîne. Ger ku Tirkiye bi şerekî nû re rû bi rû bimîne dê her kes winda bike. Niha di navbera Tirkiye û Rûsya de rageşî zêde ye. Ger ku têkiliya xwe ji Rûsya qut bike, dê bêtir li Idlibê asê bimîne. Dê Rûsya Tirkiyeyê ji Idlibê derxe. Tirkiye niha dixwaze NATO û DYE'ê têxe navberê. Li aliyê din penaberan dike mijara bazarê û qeyranê kûr dike. Ji ber ku li dervê axa Tirkiye êrîş pêk hatiye ji dewletên NATO biryar derket ku nikare tev li pêvajoyê bibe. Weki êrişa li dijî Tirkiye negirt dest. Eger NATO têkeve nava kar pirsgirêk dê bêtir aloz bibe." 

 

'DIXWAZE BI PENABERAN ZEXTAN LI SER YEKÎTIYA EWROPA BIKE' 

 

Karataş, da zanîn ku îqtîdar bi polîtîkayên penaberan dixwaze zextan li ser Yekîtiya Ewropa (YE) û Neteweyên Yekbûyî (NY) bike û wiha axivî. "Îqtîdara AKP'ê penaberan dike çek û xistiye destê xwe. Dixwaze bi penaberan gefan li welatên Ewropa bixwe. Piştî mijara Idbilê Tirkiye deriyê penaberan li welatên ewropa vekir. Tirkiye dixwaze bi vê yekê Neteweyên Yekbûyî, NATO û DYA zextan li ser Rusya zêde bike. Niha qeyrana penabran heye. Niha nêzî 4 milyon penaber li Tirkiyeyê hene. Ev hêjmarek pir mezin e. 

 

MA / Cemîl Ugur