WAN - Piştî konvoya alîkariyê ya şaredariyên HDP’î ji bo gundên erdhej lê rûda şandin ji aliyê leşker û polîsan ve hat astengkirin, paşve ji bo Wanê hat şandin. Parlamenterê HDP’ê Mûrat Sarisaç, diyar kir ku ger pêwîst bike ewê yek bi yek amûran li gel belav bikin.
Şandeyeke ji Hevserokê Kongreya Civaka Demokratîk (KCD) Berdan Ozturk, Hevberdevkê Kongreya Demokratîk a Gelan (HDK) Sedat Şenoglû, Hevseroka Giştî ya Partiya Herêmên Demokratîk (DBP) Salîha Aydenîz, Parlamenterên HDP’ê Mûrat Sarisaç, Mûazzez Orhan û Mûsa Farîsogûllari, endamên Meclîsa HDP’ê, Hevşaredarên HDP’î, hevserokên bajêran, rêxistinên bajar û navçeyan pêk tê, çûn navçeya Elbak a Wanê ya erdhej lê pêk hat. Şaredariyên HDP’î yên alîkarî kom kiribûn, di saetên serê sibê de li ser rêya Wan-Payîzava-Westanê pev gihandin. Şandeyê dûre, bi qemyonên alîkariyê re konvoy avakirin û ber bi navçeya Elbakê ketin rê.
DESTÛR NEDAN KONVOYA ALÎKARIYÊ
Qemyonên alîkariyê, li Qereqola Leşkerî ya Albayrakê (Bebleşîn) ji aliyê leşker û polîsan ve hatin rawestandin. Ji ber ku destûr nehat dayîn ku 4 qemyonên zexîrê, paçê zarokan û branda têde, derbas bibin nîqaş di navabera şandeyê û leşkeran de derket. Polîs û leşkeran, dan zanîn ku wê alîkarî bi destê AFAD’ê bê belav kirin û wê malzemeyên heyî teslîmî koordînasyonê bikin, berevajî ewê destûrê nedin ku alîkarî derbasî gundan bibin. Şandeyê li ser vê yekê, got ku ewê qemyonên alîkariyê teslîmê AFAD’ê nekin û biryar da ku qemyonên alîkariyê paş ve bibin Wanê.
‘DESTÛR NADIN KU EM ALÎKARIYÊ BIBIN’
Şandeya ji 150 kesan pêk hat ev rewş şermezar kir û daxuyanî da çapemeniyê. Parlamenterê HDP’ê yê Wanê Mûrat Sarisaç, daxuyanî da û wiha got: “Em vê pêkanînê tu carî qebûl nakin. Em dixwazin ku alîkariya şaredariyên HDP’ê kom kirine ji, kesên mexdûr re bibin. Lê destûr nadin ku em vê alîkariyê bibin ji welatiyên di erdhejê de zirar dîtine. Li gorî agahiya hatiye ber destê me, heya niha alîkariyên pêwîst ji bo gelê me nehatiye kirin. Em jî dixwazin bi hewldanên xwe alîkariyê bibin ji gelê xwe re. Lê alîkariya me asteng dikin. Bi tu awayî ev di qanûnên Tirkiyeyê de tuneye. Ji derveyî AKP’ê destûr nayê dayîn ku kes bi gel re bên gel heve û bi hevre tevbigerin.”
‘EMÊ VAN MALZEMEYAN BIGIHÎNIN GEL’
Sarisaç, da zanîn ku wezîrên AKP’î bi derfetên dewletê li herêmên erdhejan tenê hunera xwe nîşan dan û wiha axivî: “Lê agahiyên di serê sibê de gehiştin destê me, heya niha kon ji bo wan mirovan nehatine dayîn û alîkariya wan nehatiye kirin. Bi astengkirina vê alîkariyê ne tenê HDP tê mexdûrkirin. Bi vê yekê gel jî mexdûr dikin. Emê tu carî van zextan qebûl nekin. Emê alîkariya xwe jî teslîmî AFAD’ê nekin. Ger pêwîst bike, em yek bi yek vê alîkariyê bigihînin gelê xwe. Bila gumana kesekê ji vê yekê tune be.”
Şandeyê, piştî daxuyaniyê konvoya alîkariyê paşve şand Wanê û ew bi xwe jî, ji bo ku welatiyên di erdhejê de zirar dîtine, ziyaret bikin, ketin rê.