AMED – Endamê Meclîsa Ciwanan a HDP’ê bertek nîşanî zextên li ser endamên xwe dan. Meclîsa Ciwanan û Jinên Ciwan a HDP’a diyar kir ku ciwanên her tim li dijî îqtîdarê ne dibin armanca êrişên îqtîdarê.
Meclisa Ciwanan û Jinên Ciwan a HDP’a Amedê li dijî zext û pêkûtiyên li ser endamên meclîsa xwe li avahiya HDP’a Amedê civîna çapemeniyê li dar xistin. Parlamenterên HDP’ê yên Amedê Dersim Dag û Remziyê Tosûn, Hevseroka Rêxistina HDP’a Amedê Hulya Alokmen Ûyanik, rêveberên HDP’ê û endamên ciwanan beşdarî civînê bûn.
‘ZEXTÊN BÊRÛMETIYÊ DIKIN’
Beriya daxuyaniyê parlamenter Dersim Dag axivî û bertek nîşanî zextên li dijî ciwanên HDP’yî da û got: “Dixwazin ciwan li ber wan serî bitewînin û roj naçe ku li ser hevalên me ciwan zextan nakin. Dixwazin berxwedan û têkoşîna ciwanan biçewisînin. Bi binçavkirin, revandin û girtinan dixwazin zextan pêk bînin. Tevî vê yekê jî ciwanên HDP’yî roj bi roj bi berxwedan û têkoşîna xwe mezin dibe. Serkeftin wê bibe ya polîtîkaya aştîxwaz a ciwanan û perspektîfa birêz Ocalan.”
‘ÎQTÎDARÊ XEBATÊN CIWANAN ME KIRIYE ARMANCA XWE’
Li ser navê ciwanan endamê Meclîsa Ciwanan a HDP’a Amedê Abdulbarî Mavlay daxuyanî da û bertek nîşanî zextên li ser endamên wan da.
Daxuyaniya ji aliyê Mavlay ve hat xwendin wiha ye:
“Bi salan e li Tirkiyê şertên aborî gelekî zehmet in û ji hêlekê ve jî krîza siyasî û civakî her ku diçe kûr dibe. Lê desthilatdariya AKP’ê bi polîtîkaya faşîzmê dixwaze welat bi rêve bibe û herî zêde jî êrîşên xwe yên li dijî ciwanan zêde dike. Ciwanên ku her dem li dijî desthilatdariyê muxalîfin, di hedefa desthilatdariyê de ne.
Di demên borî de gelek jinên ciwan û endamên meclisên me zext dîtin, gef li wan hat xwarin û piştî hatin revandin, xwestin wan bikin sîxûr. Hevrêyên me yên ku ev plana qirêj qebûl nekirin, bi awayekî dijî hiqûqê hatin girtin. Herî dawî di navbera 19 û 20’ê meha Çileyê de operasyoneke qirkiriya siyasî pêk hat û 4 endamên meclisên me hatin binçavkirin. Di bin çavan de dema binçavkirina wan hat dirêjkirin û gefên sîxûriyê li wan hat xwarin. Ev polîtîkaya qirêj îro jî berdewam dike.
Hêj li ser dema binçavkirinê re hefteyek derbas nebû, di 29’ê Çileyê de hevalên me Sadun Tutmaz, di 1’ê Sibatê de Muhsîn Acar, di 3’yê Sibatê de dîsa Sadun Tutmaz û Mesut Agirtaş hatin binçavkirin. Ji van hevalên me Sadun Tutmaz di nava pênc rojan de du caran hat binçavkirin.
Bi van êrîşên herî dawî re jî tê dîtin ku faşîzma xwînrij tu hewldanên ciwanên bi rêxistinkirî tehmul nake û her dem êrîşê wan dike. Bi van êrîşên hovane dixwaze rêxistinbûna ciwanan belav bike û wan bê pergal bihêle. Lê divê bê zanîn ku em wekî ciwan, ew ruhê ku me ji nifşên 68’an girtiye, em ê li her derê ruhê şoreşgerî bi pêş bixin û rêxistinbûna xwe xurt bikin. Bi vî ruhê şoreşgerî em ê hemû êrîşên desthilatdariyê vala derxin û têkoşîna xwe ya li dijî faşîzmê mezin bikin.
Dê zext nikaribin me bêzar bikin. Bijî berxwedana ciwanan”