STENBOL - Hunermend Mazlûm Çîmen ku di Komkujiya Sêwazê de bavê wî Ozan Nesîmî Çîmen jî jiyana xwe ji dest dabû, nerazîbûna xwe ya ji bo berdana kujer anî ziman û got: "Sûcê li hemberî mirovahiyê nayê qebûlkirin".
Di sala 1993'yan de li Otêla Madimakê 35 nivîskar, rewşenbîr û hunermend hatibûn kuştin. Çend roj berê Serokomar Tayyîp Erdogan, ji bo yek ji bersûcên Komkujiya Sêwazê Ahmet Tûran Kiliç (86) îmze danî binî efûkirinê û ji ber vê Kiliç hat berdan. Bertek û nerazîbûnên ji bo vê didomin.
Hunermend Mazlûm Çîmen ku bavê wî Ozan Nesîmî Çîmen di Komkujiya Sêwazê de hatibû kuştin, got: "Li Tirkiyeyê çend kesên di vî temenî de di girtîgehê de hene? Heger tu rabî vî kesî ji ber temenê wî berî, gelo ên di hundir de? Gelek kesên di rojiya mirinê de hene, çima ji bo wan tiştek nayê kirin?"
‘EZ EFÛ NAKIM'
Çîmen, got: "Tu dikarî li gor pîvanên xwe vê yekê bikî. Mafekî wiha dane te, lê divê tu bi awayekî wisa bi kar bînî ku di nav civakê de nebe cihê hêrsê".
Çîmen, gotina Erdogan a ji bo efûya ku MHP'ê xistibû rojevê bibîr xistin ku gotibû, "Em dikarin sûcên li hmeberî dewletê hatine kirin efû bikin, lê dewlet sûcên şexsî efû nake" û got: "Heger ev tiştekî şexsî be nexwe tu jî tev l nav hestên mind dibî, ez efû nakim".
Çîmen, destnîşan kir ku êdî ji vê dubendiyê bêzar bûne û got: "Ma wê ev dubendî heta kengî bidome? Ji ber 85 salî ye tu radibî efû dikî, lê gelo çend kesên di vî temenî de û nexweş di girtîgehan de hene? Çima tu ji bo vana ji nedîtî ve têyî? Ma çavên te tenê ji bo derdora te dibînin?"
‘SÛCÊ LI HEMBERÎ MIROVAHIYÊ NAYÊ EFÛKIRIN'
Çîmen, destnîşan kir ku Komkujiya Sêwazê sûcekî li hemberî mirovahiyê ye û got: "Komkujiya Sêwazê sûcekî li hemberî mirovahiyê ye. Ji xeynî vê guh nadim tu daraz marazê. Ev sûcekî li hemberî mirovahiyê ye. Talqokirina vî sûcê, efûkirina vî sûcî nabe".
MA / Erdogan Alayûmat