ÊLIH – Li navçeya Heskîfê ya Êlihê ava Bendava Ilisûyê her ku diçe pingar dide û Heskîfa dîrokî dadiqûrtîne.
Ji navçeya Kerbora Mêrdînê heta Sêrt û navçeya Heskîfa Êlihê ava Bendava Ilisûyê daye ber xwe û bi qasî 200 cih û warên lê jiyankirinê di bin avê de dê bimînin. Av gihîşt ber navçeya dîrokî û qedîm a Heskîfê. Îsal şilî ye û av her kêliya ku diçe zêde dibe, li Heskîfê dar, pir, mal û şikeftên dîrokî di bin de tê hiştin.
Li serê bendavê av zêde bûye û hefteya derbasbûyî ji bo hilberandina enerjiyê test hatine kirin. Niha geliyê Dîcle û Botanê beşek mezin ji wan di bin avê de maye. Hat ragihandin heta niha nêzî 50 gund di bin avê de maye. Pira Heskîfê jî nîvê wê di bin avê de maye lê wisa xuya dike ku heta demek kin wê pir bi temamî di bin avê de bimîne û pêwendî bi Heskîfa nû re bê qûtkirin. Li ber Heskîfê bi qasî 15 mîtroyan av bilind bûye û cihê nû yê Heskîfê jî înşata ji bo çêkirina bendergehê didome.
GELIYÊ DÎCLE Û BOTANÊ TUNE DIBE
Firehbûna avê talankirina xwezayê jî bi xwe re tîne. Hin gund û erazî û baxçeyên welatiyan bi temamî di bin avê de man. Ji ber ava bendavê peywendiya gundan bi ya bajaran re hat qûtkirin û welatî nikarin biçin gundên xwe. Ji bo mirov biçin gundên 20 kîlometre dûr neçarin 100 kîlometreyî bigerin û xwe wisa bigihînin wir. Geliyê Botanê ku bi pir nebatî û pir cûre sewalan tê nasîn sala par wek “parak millî” hatibû ragihandin û beşek mezin ji vê di bin avê de ma.
BARO BÊDENG IN
Di meha tîrmeha 2019’an de serok û rêvberên Baroyaên Êlihê, Amed, Îzmîr, Aydin, Tekîrdag jî di nav de 17 baro li Heskîfê kom bûbûn û banga xwedî derketina li Heskîfê kiribûn. Baroyan ragihandibû ku ew ê ji bo Heskîfê têkoşîna hiqûqî bidin destpêkirin. Lê tevî hemû daxuyanî û bangan jî heta niha baroyên herêmê û hin bajarên rojavayê Tirkiyê li dijî hilweşandina Heskîfê tu hewldan nehatin kirin.