Di rapora Dîwana Muhasebetê de tê xuyakirin ku di serdema rêveberiya MHP’ê li Şaredariya Qersê gelek nelirêtî hatiye kirin. Di raporê de tê gotin ku şaredariyê di serdema MHP’ê de divê gelek xizmet bikira. Lê rêveberiya şaredariyê ya HDP’ê derxist holê ku tu tiştek nehatiye kirin û butçeya ji bo xizmetê hatiye veqetandin nelirêtî kirine. 

 

ŞAREDARIYÊ KIRINE DEYNDARÊ ŞIRKETAN 

 

Di raporê de tê gotin ku şaredariyê kirine deyndarê şirketan. Di hesabê sala 2018’an de 13 milyon 712 hezar û 826 TL pere kêm tê xuyakirin. Her wiha hatiye diyarkirin ku bêyî îhale bê kirin neguhêzbarên şaredariyê dane kirê. 

 

‘PÊVAJOYA HIQÛQÎ YA NELIRÊTIYÊ DIDOME’ 

 

Hevşaredarê Qersê Ayhan Bîlgen rapora dîwana muhasebetê nirxand û diyar kir ku piştî ew hatine ser xebatê her tiştê şaredariyê ji raya giştî re eşkere kirine. Bîlgen got têkildarî nelirêtiyên li şaredariyê hatine kirin pêvajoya darazê didome. Bîlgen anî ziman ku dema ew hatine ser kar her tiştî lêkolîn kirine û bi hûrgulî li ser xebitîne û neliêrêtiya bi salan ji bo derxin holê hêj li serê dixebitin. 

 

‘ROJEK PIŞTÎ HILBIJARTINÊ JÎ NELIRÊTÎ HATIYE KIRIN’ 

 

Bîlgen da zanîn ku rojek piştî hilbijartina xwecihî ya 31’ê Adarê roja 1’ê Nîsanê jî li şaredariyê ewraqek nelirêtiyê amade kiriye û got: “Di 1’ê Nîsanê de ewraqên pêwîst hatine temamkirin û diyare ku hin kesan ji bo karê van ewraqan îmze kiriye. Yanî van kesên ewraq îmze dikin ma qey gelo nizanin ku partiyek din rêveberiya şaredariyê qezenc kiriye? Yanî tenê ne ev di gelek mijaran de nelirêtî heye. Mesele xetên telefonê ku rêveberiya şaredariyê bikar aniye hebûn. Dema em hatin ev xet li holê tune bin. Me lêkolîn kir û ji me re gotin tiştek wisa tune ye. Lê piştî lêkolînek dirêj me tespît kir ku 25 xet û telefon hebûne. Ji bo em vê yekê hîn bibin du mehên me girt. Ji ber vê yekê ji bo em hemû nelirêtiyan derxin holê wê demek me dirêj bigire.” 

 

MA / Adnan Bîlen