Nivîskar Bahattîn Robar ku ji Cizîrê çû Amedê tev li komxebata Tora Çand û Zimanê Kurdî bû, destnîşan kir ku divê li saziyên çand û hunerê xwedî bê derketin. 

 

Robar, bîbîr xist ku piştî Rewşa Awarte gelek sazî hatin girtin, lewma lidarxistina komxebateke bi vî rengî gelekî girîng e. Robar, anî ziman ku nexasim 4-5 salên dawî ji bo hebûna kurdî û ji bo kurdî bibe zimanê perwerdehiyê xebat û nîqaş hatine kirin û got, siyasetmedarên kurd xebatên ji bo ziman tenê ji saziyên ziman re hiştine. Robar, anî ziman ku di komxebatê de kêmaniyên heyî hatine nîqaşkirin û ji bo van kêmaniyan pêşniyarî hatiye kirin û got: "Ev pirsgirêk pirsgirêkek civakiyî ye. Divê barê vê pirsgirêkê tenê li kesekî, saziyekê, nivîskarekî an jî weşanxaneyekê neyê barkirin". 

 

XWEDÎDERKETINA LI SAZIYÊN ZIMAN 

 

Her wiha Robar bal kişand ser pirsgirêkên aborî û hiqûqî yên sazî û dezgehên heyî jî û got, ji bo helkirina pirsgirêkan ewilî divê xwedî li saziyan bê derketin. Robar, got: "Divê dayikên me û malbatên me ji bo ziman hesas bin û di qadên jiyanê hemûyan de bi kar bînin. Mesela, li Cizîrê Komeleya Ziman û Çandê ya Birca Belek heye. Ev komele ji bo xizmeta zimanê kurdî bike hat avakirin. Loma divê gel ji bo xwendin, nivîsandinê bê vê komeleyê. Divê gel li komeleyên wekî Birca Belek xwedî derkeve". 

 

MA / Mujdat Can