ÊLIH - Tabelaya kurdî ya Şaredariya Bajaroka Kaniyahenê ya navçeya Hezoyê hatibû daxistin. Piştî hatibû daxistin bûbû cihê nerazîbûna. Lê belê vê carê wê sê zimana dîsa bê daliqandin.
Şaredarê Şaredariya Bajaroka Kaniyahenê ya navçeya Hezo ya Êlihê Firat Karabûlût, ji tirsa qeyûm ji HDP'ê îstifa kiribû û dû re jî tabelaya kurdî ya şaredariyê daxistibû. Daxistina tabelayê bûbû cihê nerazîbûna. Piştî vê Hevşaredar Gulîstan Sonuk û endamên meclîsa şaredariyê ev mijar xistin rojeva meclîsa şaredariyê û meclîsê jî biryar girt ku tabela ji nû ve bê daliqandin.
Hevşaredar Gulîstan Sonuk, diyar kir ku meclîsa şaredariyê biryar girtiye ku tabelaya şaredariyê bi kurdî, tirkî û erebî be û got, Karabûlût jî mecbûr maye vê biryarê qebûl bike.
Her wiha di civînê de ji Karabûlût pirsîne, "Ji bo çi tabela daxistiye" û Karabûlût jî gotiye: "Dewletê daxistiye".
9 endamên meclîsa şaredariyê hene û ji vana 6 jê HDP'î ne. Piştî biryara meclîsê tê payîn ku van rojan tabelaya sê zimanî ya şaredariyê ji nû ve bê daliqandin.