SÊRT - Bijîjkê girtiyê nexweş Nebî Îlhan ku li nexweşxaneya lê tedawî didît jiyana xwe ji dest da li gel ku ragihandiye şansê jiyanê yê Îlhan ji sedî 10 jî nehatiye tehliyekirin. Ji bo tehliyekirinê 4 caran serî li ATK'ê hatiye dayîn lê ATK'ê ji bo Îlhan raporên "dikare li girtîgehê bimîne" daye.
Girtiyê nexweş Nebî Îlhan (74) ku li Girtîgeha Tîpa E ya Sêrtê dima, beriya 3 rojan ji ber nexweşiya xwe ya rodiyan li Nexweşxaneya Dewletê ya Sêrtê hat emeliyatkirin. Îlhan, di 11'ê Çileyê de li heman nexweşxaneyê jiyana xwe ji des da. Hat hînbûn ku Nebî 2 sal in girtî ye û beriya ku bikeve girtîgehê 2 caran ji dilê xwe emeliyat bûye. Li gorî vegotinên ferdên malbatê, bijîjkan ji wan re diyar kiriye ku Îlhan emeliyat bibe jî û nebe jî şansê wî yê jiyanê ji sedî 10 e.
Malbata Îhan, li gel ku 4 caran ji bo tehliyekirinê serî li Saziya Tiba Edlî (ATK) daye jî hemû serlêdanên wan bi rapora "dikare li girtîgehê bimîne" bimîne hatine bersivandin.
BERPIRSYAR ATK YE
Parlamentera HDP'ê ya Sêrtê Meral Daniş Beştaş jî diyar kir ku yek ji berpiryarê mirinên li girtîgehan ATK ye û ev tişt anî ziman: "Li gel ku Îlhan meheka xwe ya dawîn li nexweşxaneyê derbas kiriye jî nehatiye berdan. Dadgeh di vê mijarê de biryara tehliyekirinê nadin. Dadgeh li benda mirina girtiyan e. Li gel rewşa Îlhan a nebaş jî ATK "dikare li girtîgehê bimîne" daye. Yek ji berpirsyarên mirinan ATK ye. Divê ku ji bo cenazeyê yek girtiyek jî ji girtîgehan dernekeve gav bên avêtin."
MA / Fethî Balaman