WAN - Hevşaredarên Şaredariya Erdîşê Yildiz Çetîn û Bayram Çîçek jî di nav de îdianameya der barê 11 kesan de hat amadekirin. Şahidên nepen ê îdianameyê dibêje: "Gava li çayxaneyê bûm deng hat min. Hevşaredaran digot, em bi dewletê re şer bikin, dozger, qeymeqam, bikujin û li emniyet û cendirmeyan bidin".
Hevşaredara Erdîşê Yildiz Çetîn di 22'yê Cotmeha 2019'an de hatibû girtin û Hevşaredar Bayram Çîçek jî bi şertê kontrolkirina edlî hatibû berdan. Her du hevşaredar jî di nav de îdianameya derbarê 11 kesan de hat amadekirin û Dadgeha Cezayê Giran a 7'an a Wanê jî qebûl kir. Hevşaredar, endamên emclîsê û welatiyên di îndianameyê de bi "endamtiya rêxistinê", "lidarxistina civîn û meşên der qanûnî" û "alîkariya rêxistinê tên tawanbarkirin. Dozger îdianame spartiye îfadeyên şahidên nepen, qeydên tapeyan, têkiliya hevşaredaran a bi KCD û TJA'yê re û tevlêbûna wan a çalakiyên ji bo şermezarkirina qeyûman.
SENARYOYÊN ŞAHIDÊ NEPEN
Tiştên Hevşaredar Yildiz Çetîn pê tên tawanbarkirin, hema bêje piranî jê spartine îfadeyên şahidên nepen ên bikoda "03EFCD38" û "20XTRKM6Z".
Şahidê nepen di îfadeya xwe de dibêje: "Ez li avahiya HDP'ê ya Erdîşê bûm. Gava ji bo çay çûm ocaxa çayê, deriyê odeya rêveberiyê vekirîbû. Bi qasî tê bîra min hevşaredar û endamên partiyê di nav xwe de digotin, 'Li navçeya me ev qas kes tên binçavkirin û girtin. Ev qas ciwan hene, çima kes bertek nîşan nade, her derî serobino nake. Çima kes danakeve kuçeyan û şer nake? Zilmê li me dikin, divê em hesabê vê yekê bipirsin, dakevin kuçeyan û her derî serobino bikin. Em bi dewletê re şer bikin, dozger, qeymeqam bikujin, li emniyet û cendirmeyan bidin, kuçeyan belawela bikin. Di destê rêxistinê de ev qas çek û bombe hene, çima naşoxulîne?' Gava li ocaxê bûm min ev tişt bihîstin. Her wiha kesên li wir jî ji hev re digotin, 'Belê belê, divê em bikin. Heqet çima em nakin?' Kesekî ji wan digot, 'Hadê em biçin kuçe û kolanan. Kevir li ser kevir nehêlin'. Paşê her kesî li çepikan da. Dû re ji wir derketim çûm".
Her wiha şahidê nepen ê bi koda "20XTRKM6Z" jî di îfadeya xwe de gotiye: "Ev kes (Yildiz Çetîn), hevşaredara berê ya Payîzavayê ye. Gava li Payîzavayê bû bi awayekîçalak di nav KCD'ê de dixebitî. Delegeya KCD'ê ya Wanê ye."
ÎFADEYÊN ŞAHIDÊ NEPEN PÛÇ KIR
Her wiha tiştên Hevşaredar Bayram Çîçek jî pê tê tawanbarkirin hemû îfadeyên şahidên nepen in. Şahidê nepen û şahidên aşkere ji bo Çîçek derpêş kirine ku Çîçek pêwendî bi çiyê re daniye. Lê belê kifş bû ku şahid derewan dikin, ji lewre dema ku şahid behs dikin wê çaxê Çîçek li bajarekî din bûye û dixebitî. Çîçek, di îfadeya xwe de gotiye: "Ez van tiştan qebûl nakim. Di sala 2013'an de ez li Hatayê bûm û di Midûriyeta Xurekan de dixebitîm û her wiha ez xwendekarê zanîngehê bûm. Di Sibata 2016'an de hatime Erdîşê. Yanî tiştên ev eks dibêje, wê çaxê ez ne li Erdîşê bûm. Qebehetan dixe stuyê min".
Wê danişîna ewil a dozê di 15'ê Nîsanê de li Dadgeha Cezayê Giran a 7'an a Wanê pêk bê.
MA / Adnan Bîlen