STENBOL - Rojnamevan Seyît Evran, anî ziman ku DYA bi kuştina Qasim Silêmanî re Stratejiya Navend-Hawirdorê ya Tehranê hedef girtiye û got, wê qadên pevçûnî berfirehe bibin.
Piştî DYA'yê Fermandarê Hêze Qudûsê Qasim Silêmanî û Cîgirê Serokê Heşdî Şabiyê Ebû Mehdî el Muhendîs kuşt, rageşiya li herêmê zêde bû. Rojnamevan Seyît Evren rewşa li herêmê nirxand.
Evran, destnîşan kir ku Silêmanî wisa bi rasthatinî hedef nehatiye girtin û hedefgirtina wî girêdayî Projeya Rojhilata Navîn a Mezin e û got, li herêmê nakokî-têkilî-pevçûn zêde bûne û piştî van her sê merheleyan wê pevçûnên mezin rû bidin.
‘STRATEJIYA NAVEND-HAWIRDORÊ'
Evran, diyar kir ku bi sûîqasta Silêmanî re Stratejiya Navend-Hawirdorê ya Îranê hedef hatiye girtin û got: "Ev stratejî; stratejiya ku Îran tehdît û gefên li hemberî xwe li derve pêşwazî bike. Serekê vê stratejiyê Silêmanî bû. Lê dibe ku ev darbeya DYA'yê, li herêmê bibe sedema zêdebûna fealiyetên Îranê".
‘WÊ QADÊN PEVÇÛNÎ BERFIREH BIBIN'
Evran, destnîşan kir ku Îran ne welatekî ji rêzê ye û got, Îran xwedî pergaleke dewletbûnî ya 3 hezar salî ye. Evran, anî ziman ku ji Iraqê heta Lubnanê, ji Yemenê heta Sûriyeyê û ji vira jî heta Afrîkayê qadeke berfireh a Îranê heye û got: "Dibe ku Îran ji bo mîsîllemeyê ecele neke. Wê bisekine, li benda firsendê be. Ez dibêm wê bi vî awayî tola xwe hilîne. Ji xwe ji daxuyaniyên rayedarên Îranê jî dixuyê ku wê qadên pevçûnê berfireh bike û wê çalakiyên mîsîllemeyî çê bike. Ev jî nîşan dide ku wê di pêşerojê de qadên pevçûnê berfireh bibin".
‘DIBE DEWLET BI HEV RE ŞER BIKIN'
Evran ku got "Êdî ne wekî berê ye, artêşên du dewletan bi hev re şer nakin. Şerên niha li ser esasên tenîkê tên kirin" anî ziman ku heger çekên teknîkî bên bikaranîn wê welatên herêmê hemû tesîrê jê bigirin. Evran, got: "Belkî ji nişkave çê nebe, lê niha pêvajoyeke dorfireh û berbelav dest pê kiriye. Li gor qenaeta min divê ev êdî wekî şerê dewletan bê binavkirin".
KURD Û YEKÎTÎ
Evran, anî ziman ku bûyerên li herêmê ji bo kurdan tehdîdine mezin in û got: "Qada şerê muhtemel herêmên kurda ye. Loma heger kurd nebin yek wê tesîreke mezin jê bigirin. Loma tenê rêyek li be rkurda ye ew jî yekîtiya neteweyî ye. Ji xeynî vê tu rê tunene".
Her wiha Evran rewşa Tirkiyeyê jî nirxand. Evran, diyar kir ku sûîqasta navbirî tê wateya ku şerên wekaletî cihê xwe dewrî şerên esaletê kirine û got, welatê ku ewilî berê xwe daye şerê esaletê Tirkiye ye. Evran, got: "Li herêmê du hêzên guherandina statukoyê asteng dikin hene; Îran û Tirkiye. Tirkiye, li Sûriyeyê bûbû kirdeya şerên wekaletê. Di 26'ê Tebaxa 2016'an de Tirkiye qîma xwe bi şerê wekaletê neanî û li Sûriyeyê ket El-Bab, Ezaz û Cerablûsê. Paşê di sala 2018'an de jî ket Efrînê û disala 2019'an de jî ket Bakur û Rojhilatê Sûriyeyê û şerê esaletê da destpêkirin. Yanî li herêmê welatê ewil daxilî nav şerê esaletê bû Tirkiye ye. Piştî vê bûyerê wê hêzên mezin jî dakevin qadê".
MA / Nacî Kaya