STENBOL - Girtî Ergîn Aktaş, Serdal Yildirim û Abdullah Turan yên bi tena serê xwe nikarin bijîn û nikarin di girtîgehê de bimînin tevî raporên ATK'ê yên nikarin li girtîgehê bimînin jî nayên berdan. Rêvebera ÎHD'ê ya Stenbolê Hatice Onaran, diyar kir ku dewlet qerfê xwe bi girtiyan dikin û wan terkî mirinê dikin. 

 

Li gorî daneyên Komîsyona Girtîgehan a Komeleya Mafên Mirovan (ÎHD) li girtîgehên Tirkiyeyê 457 jê giran bi giştî hezar û 333 girtiyên nexweş ku divê bên berdan hene. Li Girtîgeha Tîpa R a Metrisê ya Stenbolê Ergin Aktaş tevî ku destê wî jê bûne û nikare pêdiviyên xwe bibîne nayê berdan. Dîsa girtiyê felç bûye Serdal Yildirim û dîsa girtiyê felç Abdullah Turan ku bi tena serê xwe nikarin bijîn serbest nayên berdan. 3 girtiyên ku rapora  Saziya Tipa Edlî (ATK) heye û li gorî raporê divê serbest bên berdan jî serbest nayên berdan. Saziyên girtîgehê u rayedar rapora ATK'ê paşguh dikin û girtiyan serbest bernadin. 

 

Rêvebera Komîsyona Girtîgehan a Şaxa ÎHD'ê ya Stenbolê Hatice Onaran bal kişand ser rewşa girtiyan û wiha got: "Îhlalên li Girtîgeha Metrisê li pêşiya jiyana girtiyan talûke ye. Ergin Aktaş bêyî daxwaza xwe ji Girtîgeha Tîpa R a Menemena Îzmirê sewqî Girtîgeha Metrisê kirine. Aktaş ji ber dermankirina şaş bi nexweşiya tuberkulozê ketiye. Ji roja Aktaş hatiye Metrisê heta niha dermankirna wî di nava şert û mercên qirêj de tên kirin. Divê girtiyên nexweş li nexweşxaneyên bê kêmasî bên dermankirin." 

 

Onaran, da zanîn ku ji bo Aktaş, serî li Wezareta Dadê, Midûriyeta Girtîgehan, Saziya Mafên Mirovan a Bajêr û Dozgeriya Komarê dane, lê belê serlêdanên wan nehatine bersivandin.

 

Her wiha Onaran ji bo Abdûllah Tûran jî anî ziman ku ji stû berjêr felcî ye û got: "Abdûllah Tûran jî bi her awayî bêyî kesekî din nikare jiyana xwe bidomîne. Serdal Yildirim jî ji navê berjêr felcî ye. Lê belê piştî qezayê platîn xistine mazmazkên wî. Gava wî birine nexweşxaneyê platîn ji cih derketiye û divê dîsa bê emeliyatkirin. Pêdiviya her sê girtiyan bi alîkariya hin kesên din heye. Lê her sê jî di heman qawîşê de ne".

 

‘DEWLET ÎŞKENCEYÊ DIKE'

 

Onaran, destnîşan kir ku li Girtîgeha Tîpa R dewlet îşkenceyê dike û got: "Ne îşkence be ma çi ye. Di şert û mercên xirab de ragirtina girtiyan, ligel kîn û nefretê îşkence, bi tena serê xwe mayîna wan feraseta 'bimirin û ji vira biçin' bi xwe ye".

 

Onaran, raporên ATK'ê yên derbarê Aktaş, Yildirim û Tûran de jî bibîr xist û got, ligel van raporan dîsa jî nayên berdan. Onaran, destnîşan kir ku ev pêkanîneke derî mirovahiyê ye û got: "Ê Ergîn Aktaş destekî wî ji zendê û destek wî jî enîşkê ve tuneye. Jixwe ji roja hatiye binçavkirin heta hatiye girtin wiha bûye. Paşê protez xistin milên wî. Protezên wî jî pir mezin in. Nikare bi kar bîne. Lê dîsa jî protezan li gor xwe eyar dike û hewl dide bi kar bîne. Serdal Yildirim jî divê bê emeliyatkirin û platîna wî bê nûkirin. Lê belê li nexweşxaneyê bijîşkan jê re gotiye, 'Em nikarin te emeliyat bikin. Berê kî kiribe divê biçî cem wî'. Heman bijîşk gotiye, 'Em dikarin bikin, lê ji ber şert û mercên girtîgehê ne hîjyenîk in em nikarin bikin'. Yanî niha di van şert û mercan de emeliyatkirina wî ne mimkun e. Ê Abdûllah Tûran jî ji ber ji stû berjêr felc e ew jî divê bi awayekî perîyodîk bê tedawîkirin û egzersizan bike. Lê belê tedawiya wan bi derengî tê xistin".

 

‘CIHÊ ŞERMÊ YE'

 

Onaran, destnîşan kir ku şert û mercên Girtîgeha Metrîsê nebaş ein û got, ji be rcilşoya girtîgehê naşoxule girtî kincên xw ebi dest dişon. Onaran, got: "Ên lingên wî baş in kî ye Ergîn, ên destên wî Serdal. Aha yek jê bi lingan pêl kincan dike ê din jî bi destan wan diguvêşe. Bi rastî jî ev rewş cihê şermeke mezin e".

 

‘BIRYAREKE SIYASÎ YE'

 

Onaran, ji bo gavneavêtina dewletê jî got: "Loma em tim û tim dibêjin, divê mijara girtiyên nexweş nebe mijara bazarê û demildest bên berdan. Ji ber em bi dewletê û dogerê wê dizanin, em dixwazin êdî dawî li vê rewşê bê. Dewlet bi vî awayî girtiyên nexweş îşkence dike".

 

MA / Erdogan Alayûmat