STENBOL - Rojnamevan Îslam Ozkan, bal kişand ser rewşa li Lîbyayê û şandina esekeran û got: "Şandina esekeran helwesteke bêbesîret e".
Serokê Giştî yê AKP'ê û Serokomar Recep Tayyîp Erdogan, di 9'ê Kanûnê de gotibû, "Heger Hikûmeta Mûtabaqatê ya Neteweyî ya Trablûsê bixwaze em ê esekeran bişînin Lîbyayê". Li ser vê "Hikûmeta Mûtabaqatê ya Lîbyayê" jî di 26'ê Kanûnê de ji Tirkiyeyê xwest ku destekê bide wan. Hat diyarkirin ku wê Desteya Giştî ya Meclîsê ji bo vê meselê di 2'yê Çileyê de kom bibe. Rojnamevan Îslam Ozkan, destnîşan kir ku ev pêngav pêngaveke ku dê şer gurtir bike.
'HELWESTEKE BÊBESÎRET'
Ozkan, gotinên Erdogan bibîr xistin ku gotibû "Heger Lîbya bixwaze em dikarin esekeran bişînin". Ozkan, anî ziman ku wê ev biryar bibe sedema pirsgirêkên mezin û got: "Tirkiye ji dêvla şandina eskeeran dikaribû bi alternatîfên dn tev bigere. Nexasim jî bi hewldanên dîplomatîk. Mesela dikaribû ligel Yekîtiya Ewropayê (YE) tev bigeriyana, bi Fransa û Îtalyayê re dîplomasî bikirana û zorê bidana wan li dor maseyekê rûnên. An jî madem îdia dike têkiliyên wê yên bi DYA û Rûsyayê r ebaş in, dikaribû van têkiliyên xwe bi kar bîne û hêzên Hafter û artêşa girêdayî Hikûmeta Mûtabaqatê ya Neteweyî li dor maseyekê bihaniya cem hev. Lê bêyî van tiştan bike dîplomasiyê binpê dike. Şandina esekeran helwesteke bêbesîret e".
‘ŞAŞIYA LI SÛRIYEYÊ TÊ DUBAREKIRIN'
Ozkan, destnîşan kir ku Tirkiye vê carê şaşî û çewtiya xwe ya li Sûriyeyê li Lîbyayê dike û got, bi şandina esekeran wê şerê navxweyî yê li Lîbyayê bi dawî nebe. Ozkan, anî ziman ku wê Tirkiye bi şandina esekeran xwînê nede sekinandin, berevajî wê bibe sedema herikandina xwînê. Ozkan, got: "Tirkiye dikare nehêle hikûmeta Trablûsê hilweşe. Dibe di warê lojîstîk de destekê bide. Lê şandina eskeeran tiştekî cuda ye. Dibe hûn alîgir bin, lê divê ev alîgirî jî xwedî rêgeekê be. Heger ne xwedî rêgez be, nexwe tê wateya ku hûn nikarin şer rawestînin, hûn nikarin alîgirên li dor maseyekê bînin cem hev. Ev tiştên girîng in. Divê hay ji van tiştan hebe".
Ozkan, destnîşan kir ku Tirkiye, li qada navneteweyî ji ber polîtîkayên xwe bi tenê maye û got: "Tirkiye dixwaze ji vê tenêtiyê xelas bibe. Gava ligel Rûsyayê gavina davêje vê carê di navbera wê û DYA de krîz kûr dibe. Ev hemle jî ji ber vê tenêtiyê ye. Lê heger hûn bêjin şandina esekeran wê tesîreke çawa li têkiliya bi Rûsya û DYA û bi cînaran re bike, ez dibêm wê bibe cihê rageşiyeke mezin. Heger Tirkiye di çaçroveya hêza aştiyê ya NE'yê de tev bigeriyana dibû ku ev yek bê qebûlkirin. Çimkî wê ji bo aştiyê esker bişandana. Lê tişt aniha dike wê şer gurtir bike".
MA / Ferhat Çelîk