Piştî rapora Nirxandina Hawirdorê (ÇED) a ji bo Projeya Qenla Stenbolê 10 rojan hat taloqkirin, stenbolî ji bo betalkirina projeyê bi daxwaznameya serî li Wezareta Hawirdor û Bajarsaziyê didin. Stenboliyan, destnîşan kir ku Projeya Qenalê ji bo Tirkiyeyê felaketeke mezin e û gotin: "Pêdiviya me bi kar û bar heye. Pêdiviya me bi dînitiyên wiha tuneye. Divê guh bidin dengê gel". 

 

‘JI BO RANTÊ TÊ TUNEKIRIN' 

 

Îmam Yilmaz ku ji bo daxwaznameyê bide ketiye dorê, anî ziman ku ew peywira xwe ya welaîbûyînê bi cih tîne. Yilmaz, bal kişand ser projeyê û got: "Pêdiviya me bi projeyên wiha dînîtî tuneye. Li vî welatî mirovên tî û birçî, mirovên li derve radikevin heneç Krîzeke mezin heye. Heger tiştekî wiha bikin divê ji me welatiyan bipirsin. Dibêjin wê 75 milyar dolarî ji bo vê projeyê xerc bikin. Bi vî pereyî karin gelek tiştên din bikin. Ji bo mirovan kar peyda bikin. Li Stenbolê gelek avahî hene ku nikarin li ber erdhejê di ber xwe de bidin. Bira wan çê bikin. Hûn ê ji bo hin kesan ava me, qadên me yên jiyanê tune bikin. Bang ciwanan dikim. Divê hûn pêşeroja xwe biparêzin. Li dijî vê derkevin". 

 

‘PÊDIVÎ BI DÎNÎTIYAN TUNEYE' 

 

Durdane Çîlesîz jî bal kişand ser pirsgirêkên bajêr û got: "Çima wan hel nakin. Em naxwazin ev der pêşkeşî hin kesan bê kirin. 5 roj in nexweş im, lê ji bo zar û zêçên xwe ji ji Gungorenê hatime Beşîktaşê. Heger em welatiyên Tayyîp beg bin, nexwe bila dengê me bibihîse. Em qebûl nakin. Wê ev proje xwezayê tarûmar bike, wê bibe sedema erdhejê. Pêdivî bi dînîtiyên wiha tuneye". 

 

‘FELAKET E' 

 

Emîne Turkoglû jî ji bo pêşeroja zarokên xwe hatiye û got: "Min li daxuyaniya Ekrem Îmamoglû ya ji bo vê projeyê mêze kir. Rewşeke felaket e. Ev tenê ne ji bo Stenbol ji bo Tirkiyeyê jî felaketeke mezin e. Loma em li vira ne". 

 

‘JI BO XWE DIKIN' 

 

Fûrkan Al jî got: "Ne ji bo Stenbolê ji bo xwe dikin. Em li dijî vê projeyê ne. Loma em hatine vira". 

 

Ak, destnîşan kir ku maliyeta projeyê çend qatan zêdetirî budçeya Tirkiyeyê ye û got: "Radibin dibêjin pere tuneye û fabrîkaya tanq-paletan difiroşin. Niha jî rabûne behsa 75 milyar dolarî dikin. Li Tirkiyeyê heta tu bêjî betalî heye. Ez xwendekarê zanîngehê me. Niha difikirim gava mezûn bibim ez ê çi bikim. 300 TL avêtins er meaşê kêm. Niha em ji ziktêrkirinê derbasî asteke din dibin. Dibêjin sedema projeyê ew e ku li kendavê keştî li peravan nekevin. Lê niha wê vê yekê li qadeke hîn tengtir çê bikin. Wê li vira îneşatan çê bikin. Li kendava ev qasî mezin wê keştî li peravan bikevin lê wexta qenal çê bibe wê lê nekevin. Tiştekî eletewş. Ne pêdiviya Stenbolê ne jî ya Tirkiyeyê bi projeyeke wiha tuneye. Pêdiviya me bi kar û bar heye. Li vira b hezaran kes heye. Divê îktîdar wan bibîne". 

 

Huseyîn Karabûlût jî destnîşan kir ku ew ne li dijî veberhênaniyê ye, lê belê pêdivî bi çi hebe divê ew bê kirin. Karabûlût, anî ziman ku li welat krîzeke mezin heye û got: "Çend roj berê meaşê kêm aşkere kirin. Hema bira parlementerek rabe û bi vî meaşî debara xwe bike. dikare bike? Em nikarin meaşekî baş bidin karkerên xwe û em radibin qala Projeya Qenal Stenbolê dikin? Cotkarî nemae. Perwerdehî lawaz bûye. Di qada zanistê de em di binî de ne. Pêdivî bi vê yekê tuneye. Pêdiviya welat bi perwerdehiyeke baş, bi destekirina kedkar, karker û zanistê heye". 

 

‘TIŞTÊN HÎN GIRÎNGTIR HENE' 

 

Hulya Ozturk jî got: "Ez li dijî vê projeyê me. Li welatê me heta tu bêjî bes betal hene. Bi vî perî dkarin vê mexdûriyetê hel bikin. Beriya vê projeyê tiştên hîn girîngtir hene. Mesela erdên ji bo çandiniyê bikêr tên hene. Divê ew neyên tunekirin. Em li dijî betonê ne. Em ji bo zarokên xwe, ji bo neviyên xwe, ji bo xweza û pêşeroja xwe hatine vira". 

 

'DIVÊ GUH BIDIN DENGÊ GEL' 

 

Nejdet Arslanê astengdar jî ji Kuçukçekmeceyê hatoye û got: "Em ne dibêjin bira neyê çêkirin ne jî dibêjin bira bê çêkirin. Pêşî bira mirov bên qanehkirin. 4-5 kes radibin dibêjin em ê li vira qenalekê çê bikin. Ev nayê qebûlkirin. Projeyeke mezin e û ev her kesî eleqedar dike. Loma me daxwaznameyên xwe dan. Hêvîdar im guh bidin dengê gel". 

 

MA / Ferhat Çelik