EDENE - Rêvebirê HDP'a Edeneyê yê berê Mûstafa Yildiz, anî ziman ku polîs wî dişopînin û dîmenên mala wî digirin. Yildiz, giliyê kesên wî dişopînin kir.
Rêvebirê HDP'a Edeneyê yê berê Mûstafa Yildiz, derpêş kir ku polîs tên ber mala wî û bi kamerayan dîmenên mala wî digirin.
Yildiz, bibîr xist ku di 20'ê Adara 2019'an de Wezîrê Karên Navxweyî Suleyman Soylû wî û 7 hevalên hedef girtibûn û paşê hatibûn girtin û di danişîan ewil de hatibûn berdan. Yildiz, diyar kir ku piştî hedef hatine girtin wesayîtên markayên wan cuda cuda li ber mala wî disekinin û gava xwestine hîn bibin ew kes kî ne ew wesayît ji ber mala wî çûne.
Yildiz, diyar kir ku herî dawî di 19'ê Kanûnê de wesayîtek li ber mala wî sekiniye û 3 kes tê de bûne. Yildiz, got: "Heger tiştek bê serê min an jî malbata min berpirsiyar dewlet e. Dewlet mecbûr e welatiyan biparêze. Heger bixwazin bi rihetî karin vê bûyerê zelal bikin û tespît bikin. Çimkî di wê îstiqametê de 3-4 heb kamera hene. Plakaya wê wesayîtê sixete be jî dikarin kesên di hundurê wê wesayît de tespît bikin".
Yildiz, got: "Qey em dîsa ber bi salên 90'î ve diçin? Qey em ber bi dema cinayetên kiryar nediyar ve diçin? Em ber bi ku ve diçin ez jî nizanim. Tiştek ji destê me nayê".
Yildiz, serî li Şaxa Komeleya Mafên Mirovan (ÎHD) a Edeneyê da û li Serdozgeriya Komarê ya Edeneyê gilî kesên wî dişopînin kir.