WAN - Waniyan, destnîşan kir ku sedema krîza aborî polîtîkayên şerî yên hikûmetê ne û gotin: "Hikûmet piraniya pereyan dide bi çekan. Çi karê me li Sûriyeyê heye?"
Her diçe krîza aborî kûrtir dibe û zem li ser zemê tê kirin. Li Wanê welatiyên ku êdî nikarin heqê ceryan, av û gaza xwezayî bidin destnîşan kirin ku sedema krîza aborî polîtîkayên şerî ye.
Esnaf Nûsret Înan, destnîşan kir ku ji ber krîza aborî hindik maye dikana xwe bigire û got: "Her roj tiştek biha dibe. Du ampûlan tenê vêdxim, mehê 120 lîre heqê ceryanê tê. Tenê biroj vênaxim. Ji ber van zeman mirov perîşan bûne. Ji ber kar tuneye em di vî halî de ne. Gava kar tunebe wê esnaf jî ji mecbûrê dikana xwe bigire".
'HIKÛMET PERA DIDE BI ÇEKAN'
Înan, diyar kir ku ji ber polîtîkaya şer mirov xizan bûne û got: "Hikûmet, piraniya pereyan dide bi çekan. Niha şerê li Sûriyeyê hîn jî dewam dike. Lê tişta fêm nakim ev e; çi karê me li Sûriyeyê heye? Ev pere giş ji bo vê tên xerckirin. Niha em di rewşeke wiha de ne ku nikarin debara malbata xwe bikin. Li mala me ji xeynî nan û penêr tiştek jî tuneye. Heyf e, guneye. Li mala mirovan nan tuneye".
Huseyîn Şen jî got: "Divê hikûmet bîra vî tiştî bibe. Her roj tiştek bha dibe. Divê gavina bavêje."
Huseyîn Guney, ku berê li se rînşeatê dixebitî lê niha ji ber kar tuneye betal e got: "Ên li vira hema bêje hemû betal in. Em bi alîkariya der û cînaran debara xwe dikin. 2 zarokên min hene. Berê rewşa karê min baş bû. Me debara xwe dikir. Niha her tişt biha bûye. Em nikarin debara xwe bikin. Ji ber kar tuneye, em ji sibehê heta êvarî digerin".
'HIKÛMET HEQARETÊ DIKE'
Cafer Yuce ku berê di şaredariyê de dixebitî û qeyûm ew ji akr derxist, anî ziman ku ên dibêjin rewşa aboriyê baş e heqaretê li gel dikin. Yuce, got: "Ji ber HDP'î bûm ez ji kar derxistim. 2 sal mabûn teqawid bibim. Niha betal im. Nikarim debara xwe bikim. Zavê serokomar berat Albayrak her roj di televîzyonan de xeber dide û dibêje rewşa aboriyê baş e. Derew e, em perîşan bûne. Zarokên min dixwînin, niakrim heqê mesrefên wan bidim. Ên dibêjin rewşa aboriyê baş e heqaretê li gel dikin. Sedema vê krîzê jî polîtîkay derbarê Sûriyeyê ye. Piraniya perayn ji bo vê diçe".