Di ser operasyona bi navê "Vegera li Jiyanê" ku di 19'ê Kanûna 2000'î de pêk hat re 19 sal derbas bûn. Leşker, polis û kontrgerîlla tevlî vê operasyonê bûbûn û êrîşî girtiyên ku li dijî girtîgehên tîpên F di greva birçîbûnê de bûn kiribûn. Di vê operasyonê de 30 girtiyan jiyana xwe ji dest da û bi sedan girtî jî birîndar bûbûn. Parêzer Ercan Kanar rewşa siyasî ya wê demê û pêvajoya dozê nirxand. 

 

BÊDENGIYA LI DIJÎ PÊKANÎNA LI ÎMRALIYÊ WÊREKÎ DA HIKÛMETÊ      

 

Kanar, diyar kir ku operasyon di pêvajoyeke tundî gelek zêde bûbûn de pêk hatiye û wiha got: "Bi anîna Ocalan re pêkanîna girtîgehên bi tîpên F ketin rojevê. Bêdengiya beşên muxalîf a ji bo binpêkirinên mafên mirovan ên li Îmraliyê, di mijara pêkanîna girtîgehên tîpa F de wêrekî da hikûmetê. Paşê, hikûmetê ji bo ku pêkanîna li Îmraliyê li tevahiya girtîgehan bike meriyetê, zend û bend badan. Di sala 1989'an de jî serî li vê rêbazê hat dayîn lê ji ber bertekên zêde pêkanîn bi dawî bû."

 

BERPİRSYAR SEROKWEZÎRÊ DEMÊ YE

 

Kanar, anî ziman ku serokwezîrê demê ji operasyonê berpirsyar e û ev tişt got: " Hefteyek berî komkujiyê Zulfî Lîvanelî, diyar kiribû ku berî operasyonê bi Wezîrê Dadê re hevdîtineke kiriye û wezîr jê re gotiye, wê bi serokwezîr re biaxive lê bawer ku qanih bibe. Paşê wezîr li Lîvanelî geriyabû û gotibû ku min serokwezîr qanih nekir, di vê mijarê bi biryar e. Di rastiyê de polîtîkayek dewletê bû. Operasyon bi fermana Serokwezîr û Serfermandarê Giştî pêk hat. Berovajiyê "Vegera li Jiyanê" komkujî bû. "

 

'TENÊ DARIZANDINA ŞEKLÎ HAT KIRIN'

 

Di berdewamê de Kanar, bi lêv kir ku armanca girtîgehên bi tîpa F tecrîdkirina girtiyan bû û wiha pêde çû: "Dihat armanckirin ku di 24 saetan de girtî bên kontrolkirin. Ji vê re dîktatoriya çavdêriyê tê gotin. Niha ji ber pêşketina teknolojiyê tevahiya civakê bi vê rêbazê tê kontrolkirin. Bi girtîgehên tîpa F ne tenê fizikî girtî bi awayekî rûhî jî dîl tê girtin. Di operasyonê de bi taybetî Qomandoya Cendirme ya Xarpêtê ya Taybet û Qomandoya Cendirme ya Enqere hatibûn bikaranîn. Wê demê navên kesên ku fermana kuştinê dabûn van qomandoyan jî hatibûn aşkerakirin. Lê li gel vê yekê jî berpirsyarên siyasî û leşkerî nehatin darizandin. Tenê leşkerên di bin emir de bi awayekî şeklî hatin darizandin. 

 

'HÊ JÎ LI GIRTÎGEHAN ÊRÎŞ HENE'

 

Kanar, got ku hemû daxwazên mexdûran hatine redkirin û wiha dirêjî da axaftina xwe: "Li girtîgehan hê jî êrîş didomin. Meha borî bi darê ji bo testa DNA'yê mînaka xwînê ji girtî Esîn Kavrûk a li Girtîgeha Bayrampaşayê girtî ye, girtin. Ev yek bi tevahî li dijî qanûnan e. Tişta sosret jî xwestibûn ku careke din girtî bibin emniyetê. Ev pêkanîneke 12'ê Îlonê bû. Bi Rewşa Awarte re careke din vegerandin. Heke encamek ji darizandina Tirkiyeyê dernekeve jî dê Tirkiye ji aliyê Dadgeha Mafê Mirovan a Ewropayê ve bê mehkûmkirin."

 

MA / Tolga Guney