Piştî êrîşên Tirkiyeyê yên li ser Bakur û Rojhilatê Sûriyeyê, ji her wextî bêtir yekîtiya neteweyî ya kurd bû rojeva kurda. Di vê çarçoveyê de 10 partiyên kurd, di 5'ê Kanûnê de li Amedê hatin cem hev û ragihandin ku ew ê "Xebata Tifaqa Kurdî" bidin destpêkirin. Piştî vê civînê nûnerên partiyan ji bo yekîtiya neteweyî çûn Herêma Kurdistana Federe û hevdîtin bi partiyên siyasî û rêxistinên civaka sivîl ên herêmê re çêkirin. 

 

Hevseroka HDP'a Amedê Hulya Alokmen Ûyanik û Serokê Giştî yê Partiya Azadiyê Ayetûllah Aşitî yekîtiya neteweyî nirxandin. 

 

GAVA EWIL HATIYE AVÊTIN

 

Hevseroka Partiya Demokratîk a Gelan (HDP) a Amedê Hulya Alokmen Ûyanik, destnîşan kir ku li Rojhilata Navîn, dewletên serdest kurdan perçe kirine û got, loma rewşa li Rojhilata Navîn îşaret bi yekîtiyeke dorfireh dike. Ûyanik, bal kişand ser tifaqa di navbera partiyên kurd de û got: "Hem di hilbijartina 24 Hezîranê hem jî di ya 31'ê Adarê de, me tifaqeq çê kir. Bi wê tifaqê em çûn ser sindoqan. Bi vê bingehek hatibû danîn. Lê ew hinekî teng dima ji ber ku rewşa Rojhilata navîn yekitiyeke berfireh dixwaze. Ji ber vê hemû partî di bin sîwanekê de hatin cem hev. Hinek din gav hatin avêtin lê hêj jî kêm e."

 

Ûyanik, diyar kir ku ji niha û pê ve divê ew bi hesa tev bigerin û got, ji ber wê jî divê her kes hay ji gotinên xwe û gavên xwe, ji lew re kesên yekîtiya kurdan naxwazin li benda firsendeke wiha ne. 

 

GIRÎNGIYA ROL Û RISTA JINÊ

 

Her wiha Uyanik, destnîşan kir heke yekitiya netewî pêk neyê dê vê sedsalê jî windakirineke mezin hebe û got, yekîtî meseleyeke girîng e divê tenê ji siyasetmedaran re neyê hiştin û di vî warî de çi dikeve ser milê kê divê bike. Ûyanik, got: "Mesela divê qada jinê xebatên xwe zêdetir bikin. Ji ber ku di meseleya çareserkirina pirsgirêka kurd û meseleya yekitiyê de têkoşîna jinê xwedî cihekî girîng e. Loma di vî warî de barekî giran dikeve ser milê jina kurd û heger jin rol û rista xwe pêk bînin wê serkeftî be. Her wiha civaknas, saziyên pişeyî û kedê divê herkes tişta dikeve ser milê wî bike. Ne bêjin bila siyasetmedar pêşengtiyê bikin û em bikevin pey wan, ev ne çare ye. Ji ber wê yekê hemû qadên civakî gereke zêdetir werin ba hev du. Mesafeyên ketine di nava me de divê em bigirin. Ji bo yekitiya kurd tenê xwestin çê nabe. Karekî zor û zehmet li pêşiya me ye."

 

YEKÎTÎ

 

Serokê Partiya Azadî Ayetûllah Aşitî jî diyar kir ku ev tifaqiya partiyên kurd a li Bakurê Kurdistanê destpêkek e. Aşitî, diyar kir ku dinya xwe nû dike ji ber wê kurd jî nû bûne û got: “Çawa dinya ne dinyaya kevn e kurd jî ne kurdê kevnin. Êdî kurd xwe nasdikin. Zilm û zora dijminên kurdan, kurdan mecbûrî hev dike. Gereke kurd jî ji vê fêm bikin ku mecbûrî hev in. Ji me wêdetir kesê me tune ye.”

 

'GEL YEKÎTIYA NETEWEYÎ ESAS DIGIRE'

 

Her wiha Aşitî, bal kişand ser komxebata ku dê di 18 û 19’ê Çileyê de pêk were û wiha dirêjî da axaftina xwe: “Nûnerên kurdan wê werin cem hev û wê di wir de neqşerêyek derkeve înşalah.” Aşitî, bibîrxist ku hinek partiyên kurd ji ber hin hincetan beşdarî îtîfaqê nebûne û got: “Em dixwazin ew partî jî berşdar bibin. Ji bo ku yekitî pêk were divê kes li hincetan negere û ji bo çêbûna yekitiyê tev bigerin. Gereke kurd dev ji vî mejiyê li hincetan digerin berdin. Em hêvîdar in ku di komxebata were li darxistin de nexşerêyeke xweş derkeve.” 

 

Aştî, diyar kir ku îro roj çavê kurdên li hemû perçeyan li Bakur e û li xebatên yekîtiya neteweyî yên li Bakur e û got, heger li vira yekîtiyeke xurt çê bibe wê ev yek tesîrê li perçeyên din jî bike. 

 

Her wiha Aştî, bilêv kir ku ji bo pêkhatna yekîtiya neteweyî tu pirsgirêk û astengiyên gel tunene û got: “Gel li şexs û partiyan nanêre li doza netewî dinêre. Partî werin cem hev ji xwe gel amade ye. Di demeke ku temamî dinyayê behsa kurdan dike û li ser kurdan disekine de kurd nebin yek wê demê doza kurd û Kurdistanê li ber piya diçe. Heke îro kurd hemû werin ba hev dunya jî amade ye ku wan nas bike. Lê mixabin kurd hêj hazir nebûne ku bibin kom. Gereke ku kurd vê bizanin heta nebin yek dinya jî wan nasnake.”

 

MA / Fahrettîn Kiliç - Fethî Balaman