STENBOL – Rojnamevanan ji bo girtina rojnamevan Eser û Topaloglû, anîn ziman ku her du rojnamevan ji ber karê xwe hatne girtin, divê bên berdan û gotin: "Em şahidê rojnamevaniya Eser û Topaloglû ne."
Nûçegihanên me Sadik Topaloglû û Sadiye Eser, di 29'ê Mijdarê de gava ji buroya ajansê ya li Beyoglû derdiketin hatibûn binçavkirin û paşê bi îdiaya "endamtiya rêxistinê" hatibûn girtin. Hevalên Eser û Topaloglû, nerazîbûnên xwe yên ji bo girtina her du hevalên xwe anîn ziman û xwestin demildest hevalên wan bên berdan.
NAZLIER: EZ KEFÎLÊ NASNAMEYA WAN A ROJNAMEVANIYÊ ME
Nûçegihana Rojnameya Evsernselê Eylem Nazlier, anî ziman ku tu hêleke hiqûqî ya van girtinan tuneye û ji bo Sadiye Eserê anî ziman ku 4 salan bi hev re li daxuyaniyên çapemeniyan, di çalakiyan de hatine cem hev du û got: "Ev girtin, bi kêfî hatine kirin. Tenê sirf ji bo astengkirina rojnamevaniyê û azadiya fikr û ramanê ye. Ez kefîlê rojnamevaniya Sadiye Eser û Sadik Topaloglû me."
Nazlier, destnîşan kir ku rojnamevanî ne sûc e û got: "Demildest divê hevalên me bên berdan."
TEMEL: JI BO XURTKIRINA PIŞTEVANIYÊ BANG DIKIM
Edîtora Ajansa Nûçeyan a Etkînê, Îsmînaz Temel, destnîşan kir ku îktîdar li ber vîna rojnamevanên ku rastiyê dinivîsînin qels bûue û ji bo rojanmevaniyê wekî sûc nîşan bide manîpule dike û got: "Bi girtina Sadiye û Sadik, li derve du kesên din jî ji me kêm bûn. Lê belê ev tenê bi awayekî fizîkî ye. Em, rojnamevanên li derve em ê karê wan bidomînin. Em ê bi xurtkirina piştevaniyê, wan û hevalên xwe yên din ên girtî bi tenê nehêlin. Bang li rojnamevanan dikim ku em piştevaniya ji bo hevalên xwe bilind û xurtir bikin."
ORMAN: WÊ BÊN Û DÎSA BINIVÎSÎNIN
Nûçegihanê Ajansa Netê Emre Orman jî destnîşan kir ku di demên dawî de êrîşên li ser çapemeniya kurd zêde bûne û got: "Ez şahidêr rojnamevaniya her du hevalên xwe me. Fatûreya vê pêvajoya nebaş li çapemeniya muxalif û li kedkarên wê tê birîn. Lê belê wê bi vî hawî bi ser nekevin. Wê hevalên me bên û dîsa binivîsînin."
OZTAŞ: TENÊ DERDEK ME HEYE, EW JÎ ROJNAMEVANÎ
Nûçegihanê Rojnameya Ozgur Gelecekê Taylan Oztaş jî destnîşan kir ku ji roja çapemeniya kurd dest bi xweîfadekirinê kiriye heta niha bi zext û zoriyan re rû bi rû dimîne û got: "Ez û Sadiye û Sadik gelek caran bi hev re xebitîne. Tenê derdekî me heye, ew jî rojnamevanî ye."
ONDEŞ: DEMILDEST DIVÊ BÊN BERDAN
Edîtorê Rojnameya Yenî Yaşami Mûharrem Ender Ondeş jî diyar kir ku rojnamevanên ji xeynî nûçegihaniyê tu xemeke wan tuneye tên girtin û got, li Tirkiyeyê girtina rojnamevanan bûye kevneşopiyek. Ondeş, destnîşan kir ku wê rojnamevanên durist tim û tim heb in û got: "Bi van girtinan tê wxestin ku li derve ji xeynî çapemeniya hewzê tu çapemenî nemîne. Demildest divê hevalên me bên berdan."
MA / Mehmet Halît Çetînbaş