HDP'ê di hilbijartina 31'ê Adarê de Şaredariya Qersê ji dest MHP'ê girt. Gava HDP'ê şaredarî bi dest girt 400 milyon deynê şaredariyê hebû. Ji ber van deynan hema bêje hecz hat ser hemû mal û milkên şaredariyê. Her wiha ji ber ku şaredariyê nikaribû tevahiya deyn bide, di 30'yê Mijdarê de jî hecz hat ser meaşên karkeran. Hevşaredar Ayhan Bîlgen, ji bo heczkirina meaşên karkeran got, tu hêleke wê ya hiqûqî tuneye û di asasê xwe de ev tê wateya ku hêdî hêdî tayînkirina qeyûm. 

 

Bîlgen, anî ziman ku fîrma, esnaf û karkerên ku karê xwe baş kirine, lê belê şaredariyê ew mexdûr kirine hene û got, hin fîrma jî hene ji bo rêyên çê nekirine hecz dane destpêkirin. Bîlgen, destnîşan kir ku derbarê xebatkarên şaredariyê yên ji bo karên nehatine kirin îmze dane lêpirsîn dane destpêkirin û got: "Piştî lêpirsînê îjar em ê îcrayê bidin destpêkirin. Çimkî di vir de qezenceke neheqiyî heye. Ji xwe gava ev tişt qewimîbûn em ne li şaredariyê bûn, lê belê li vira hema bêje mantiqeke talankirinê hebûye. Yanî em ê pere, mal û milkê bajêr, mafê mirovan û xwêdana eniya karkeran nedin fîrmayên li pêy qezenceke neheq in. Di vî warî de divê em hem hesasiyeta civakê hem jî ya raya giştî têxin dewrê." 

 

JI BO AVAHIYA MÎTÊ KU LI QERSÊ TUNEYE RÊ HATIYE ÇÊKIRIN 

 

Bîlgen, destnîşan kir ku hin fîrma ji bo karine nehatine kirin ji şaredariyê doza pereyan dikin û got: "Yanî îdiaya fîrmayan ji xwe nabêjin 'me rê çê kiriye.' Dibêjin, 'me ev rê ji MÎT'ê re çêkirine.' Di şartnameya îhaleyê ya şaredariyê de ji bo kuderê hatibe xwestin li wir kar tê kirin an jî heger di hiqûqa îhaleyê de cih hatibe guhertin, di mewzûatê de bi awayekî aşkere hatiye diyarkirin ku dê guherîn bi çi awayî çê bibe. Bi talîmata devkî navnîşan nayê guherandin. Hele rabin bêjin 'ji xwe ev der MÎT', tiştek nabe, kes napirse. Çawa be wê şaredarî pereyan bide.' Feraseteke wiha nayê qebûlkirin. Mixatabên me yên di vî warî de, mevzûata li ber me ye. Ji xeynî sînorên di mewzûatên de tu înîsyatîfek me tuneye. Îjar wisa bawer dikim çend roj şûnde hem di warê bankeyan hem jî di warê îcrayê de em ê vê meseleyê temam bikin û bi awayekî pirsgirêkê hel bikin." 

 

‘LI QERSÊ QANÛNAN DERBAS NABIN!' 

 

Bîlgen, bal kişand ser hecza li ser meaşê xebatkarên şaredaraiyê jî û got: "Çawa li deverên din ên Tirkiyeyê hecza li ser meaşan pêk nayê, divê li Qersê jî pêk neyê. Heger ew qanûn li Qersê jî derbasdar bin, nexwe divê her kes li gor pîvanan tev bigere. Ji xwe heta niha têra xwe li şaredariyê nelirêtî kirine. Heta niha kontroleke baş nehatiye kirin û hesab nehatiye pirsîn. Berpisiyariya van tiştan ji ber van tiştên diviya bihata kirin lê nehatine kirin bi xwe ye. Lê îro radibin di dema me de dikin û bi vî awayî dixwazin xebatên me asteng bikin. A rast di asasê xwe de ev hêdî hêdî tê wateya tayînkirina qeyûm."

 

Bîlgen, destnîşan kir ku muxatabê wan ê sereke gel e û divê gel xwedî li vîna xwe derkeve. Bîlgen, got: "Em bi awayekî aşkere û pir zelal dibêjin; heger îro xebatên me bên astengkirin, yanî heczê deynin ser meaşê xebatkaran, wê sibê serî li rêyên din ên bêhiqûqî jî bidin. Îjar divê em vê yekê rasterast ji xwediyê vê erkê re bibêjin. Yanî heger çop neyên berhevkirin, ev ji ber ku karkera meaşên xwe nagirin. Heger karker nikaribin meaşê xwe bigirin, ev ji ber karên bêhiqûqî ye. Divê ji bo îcrayên neheq kes xwe li endîtinê daneyne. Îjar ê ku vê biryarê bide jî bajêr bi xwe ye. Heger gelê Qersê bêjin 'ne muhîm e, bila rê neyên çêkirin, em ê di nav heriyê de jî bimeşin, hûn ev qas milyon pere bidin van fîrmayan', ê vê bike ne em in. Nexwe wê vê erkê bidin kesên van tiştan dikin; lê li vira em em mecbûr in tiştên aîdî civakê biparêzin. Heger wan ev erk dabe destê me nexwe em mecbûr in ku qurîşek wan jî pêşkeşî hin kesan neyê kirin." 

 

MA / Dîndar Karataş