MÊRSÎN – Nûnerên rêxistinên jinan ên Mêrsînê, ji bo meşa ku dê di 25'ê Mijdarê de li dar bixin bang kirin û gotin: "Divê em bi hev re li hemberî şidetê bisekinin. Em tevde hê xurtir in."
Rêxistinên jinan ên li Mêrsînê ku ji bo 25'ê Mijdarê Roja Têkoşîna Li Hemberî Şideta Li Dijî Jinê amadekariyan dikin, gotin ji bo parastina destkeftiyên xwe wê bitêkoşin. Li Mêrsînê wê jin di 25'ê Mijdarê saet di 17.30yî de li hev kom bibin û ji Kuçeya Kûshîmotoyê heta Meydana Ozgecan Arslanê bimeşin û daxwazên xwe bînin ziman.
'ZILAM CESARETÊ JI ÎKTÎDARÊ DISTÎNIN'
Endama Tora Parastinê ya Jinê Çîgdem Serîn, destnîşan kir ku îktîdar ji bo pêşîgirtina li şidetê û cinayetan tu gavan navêje. Serîn, diyar kir ku tişta lezgîn astengkirina cinayetên jina ye û got: "Em dizanin heger bê xwestin cinayetên jinan dikarin bên astengkirin. Lê belê êrîş li ser Peymana Stenbolê hene. Îktîdar dibêje wê bi van qanûna û peymanan saziya malbatê bê xerakirin, lê belê ev manîpulasyon e."
Serîn, diyar kir ku saziya malbatê ji bo dewletên kapîtalîst xwedî girîngiyeke jiyanî ye û got: "Sedema êrîşên li ser van qanûnên ku li hemberî şidetê jinan diparêzin, ew e ku pergal dixwaze hebûna xwe li ser keda jinê bidomîne. Tenê ne li Tirkiyeyê, li tevahiya cîhanê her diçe newekheviyê zayendî û cinayetên jinan zêde dibin, lê belê li hemberî vê berxwedan û serîhildana jinan jî bilind dibe. Dewlet bi şidet û darê zorê bi ser van berxwedanan de diçe. Îktîdar vê yekê rasterast nake, cesaretê dide zilaman û dixwaze bi şidetê jinan bêdeng bike."
‘BAR DIKEVE SER MILÊ RÊVEBERIYÊN HERÊMÎ'
Sekreta Şaxa Egîtîm Sen a Mêrsînê Elîf Yaşar jî têkoşîna herî girîn a li hemberî şidetê hayjêxwebûn e û di vî warî de barekî mezin dikeve ser milê rêveberiyên herêmî. Yaşar, diyar kir ku divê rêveberiyên herêmî ji bo rêyekê li ber jinên bi şidetê re rû bi rû dimînin bixe, hin yekeyan ava bike û got: "Divê ji bo jinan malên hêwirandin û destekê û toreke pêwendîdanînê hebe. Her wiha divê hêzên dewletê jî, di warê têkoşîna li hemberî jinê de ji kesên perwerdekirî pêk bên. Di vî warî de divê rêveberiyên herîmî hin yekeyan ava bike. Her wiha divê xetên lezgîn jî hebin."
‘EM BI HEV RE XURTIR IN'
Endama Platforma Jinê ya Mêrsînê Fatoş Sarikaya jî destnîşan kir ku rêya herî girîng a ji bo pêşîgirtina li şidetê, bilindkirina deng e û got, ji bo vê jî divê jin bi piştevaniyî tev bigerin. Sarikaya, got: "Divê jin hemû bi vê bîrbiriyê tev bigerin. Peymana Stenbolê, Qanûna Jimare 6284'an. Divê jin hay ji van mafên xwe hebin û li ber şidetê bêdeng nemînin. Em bi piştevaniyê dikarin li ber şidetê bisekinin. Em tevde xurtir in."