Tirkiye, êrîşên xwe yên ku di 9'ê Cotmehê de da destpêkirin hê jî didomîne û dixwaze sûriyeyiyên ku di rewşa penaberiyê de ne li 'Herêma Ewle' ya ku hewl dide ava bike, bi cih bike. 

 

Li gorî daneyên Komeleya Piştevanî û Piştgiriya Penaberan, heta 31'ê Cotmehê 3 milyon û 680 hezar û 603 penaberên Sûriyeyê li Tirkiyeyê qeydkirî hene. Bi kesên ne qeydkirî re tê payîn ku nêzî 5 milyon penaberên Sûriyeyê li Tirkiyeyê hene.   

 

Tirkiye ku bi hedefa nimejkirina li Mizgefta Emeviyê raste rast tevlî şerê navxweyî yê Sûriyeyê ku sala 2011'an dest pê kir bû, timik penaberên Sûriyeyê li dijî Ewropayê weke koz bi kar anî. 

 

Walîtiya Stenbolê, di 1'ê Tebaxê de bi daxuyaniyekê ji bo terikandina penaberên sûriyeyê yên ku qeydên wan ên demkî yên parastinê tunene, heta 20'ê tebaxê dem diyar kir. Piştî Walîtiya Stembolê, Wezîrê Karên Hundir Suleyman Soylû vê dîrokê heta 30'ê Cotmehê dirêj kir. Piştî bi dawîbûna vê demê Miduriyeta Giştî ya Îdareya Koçê daxuyand ku bi awayekî dildar 34 hezar û 663 penaber çûne Sûriyeyê.  

 

Penaberên Sûriyeyê yên li Îzmîr û Edeneyê ji ber bicihkirina xwe ya li 'Herêma Ewle' bi fikar in. 

 

ZAROKA XWE YA 3 MEHÎ DI BOMBEBARANÊ DE WINDA KIR

 

Aliye Hadîp ku beriya 2 sal û nîvan, bi hevjîn û zarokê xwe re ji Helebê hatiye Îzmîr, diyar kir ku ji ber gotina 'Herêma Ewle' ya rayedarên tirk bi fikarin û wiha got: "Dema em li Helebê bûn, nexweşxaneya ku pitika min a 3 mehî lê tedawî didît, ji aliyê DAIŞ'ê ve hat bombekirin û pitika min jiyana xwe ji dest da. Perçeyên şerepnelê li serê kurê min ê 3 salî ket. Ji bo tedawiya wî em ji neçarî hatin Tirkiyeyê. Em di qamyoneke ku sewalan dikişand de bi awayekî qaçax piştî rêwiya bi saetan hatin Tirkiyeyê û derbasî Îzmîrê bûn."

 

'DAIŞ HÊ JÎ LI SÛRIYEYÊ HEYE'

 

Hadîp destnîşan kir ku piştî 3 mehan perçeyên şerepnelê ji serê kurê wê hatine derxistin û heta sal û nîvekê tedawiya bi dermanan dîtiye. Hadîp piştî demekê ji ber tundiya ku ji hevjînê xwe yê ku hê 14 salî bûye pê re hatiye zewicandin dibîne, dev ji hevjînê xwe ber dide û niha 2 zarokên xwe re dijî. Hadîp li atolyeke xişran dixebite û debara xwe û zarokên xwe dike. Hadîp destnîşan kir ku naxwaze vegere Sûriyeyê û ev tişt anî ziman: "Hê jî DAIŞ li Sûriyeyê heye. Zilma DAIŞ'ê gelek pîs e. Jixwe me her tiştê xwe ji DAIŞ'ê re hişt û reviyan. Min ji nûçeyan bihîst ku li ser lihevkirina bi Rûsyayê re Tirkiye dixwaze penaberan bibe 'Herêma Ewle'. Heke Erdogan me sûriyeyiyan bişîne, ez ê rêyek bibînim û careke din birevim. Sûriye cihekî gelek bi talûke ye."

 

'EM JI BO WAN AMÛRA SER MASEYÊ NE'

 

Hidir Kalo (68) ku di 2015'an de ji Reqeyê hatiye Edeneyê bi cih bûye jî diyar kir ku di nav şertên zor û zehmet de bi hevjîn û 8 zarokê xwe têkoşîna jiyanê dide û wiha got: "Li Tirkiyeyê penabertî gelek zor e. Me bi zorê ji xwe re jiyanek li vir ava kiriye. Lê niha dixwazin me li 'Herêma Ewle' bi cih bikin. Em ji bo wan amûra li ser maseya hesapkirinê ne. Bila êdî me nekin amûra mijaran. Bila vî şerê rawestînin."